Cabinet-in oil rate thar hman zawm rel

Petrol leh diesel-a chhiah lak tihsan chu a ngai angin sawrkarin a hmang zawm dawn a. Oil-a chhiah lak hi mipui tan veka hman tur a ni tih chief minister Lalduhoma chuan a sawi.Nilaini khan chief minister ho hian cabinet thutkhawm a ni a. Ningania thuthar thehdarhtuten an zawhchiannaah oil man tihniam tura ngentu pawl awm mah se, uluk taka an ngaihtuah nawn hnu ah chhiah lak tihpun tum hi kalpui tlang nise an ti ta tih a sawi.
Tipung ta viaua inchhal chu, oil rate hman tawh atanga chhutin, kan awmna kilkhawr dan leh inkalpawhna harsat dan ngaihtuah chuan, state dang zawng aia sang ber pawh ni ila, thil awm tak a nih theih rualin, rate sanna ber kan ni ta chuang lo tih a sawi bawk.
Chief minister sawi danin, diesel bikah VAT 10% a tisangin, social infrastructure & services cess ah Rs.2 leh road maintenance cess Rs. 2 lak a ni a. Petrol ah VAT ah 80% a tipungin, cess lakna chu diesel-a lak zat nen a inang.
Diesel man hi a hmaa litre ah Rs. 80.30 kha Rs. 87.99 ah a chho a, a punna chu litre ah Rs. 7.69 a ni, tiin, “A lan danah chuan tisang nasa tak anga ngaih theih a ni na a, Covid len hmaa diesel rate kha litre ah Rs. 86.37 a ni a, tuna a punna hi Rs. 1.62 a ni a, pung nasa a ni lo. Hmarchhak state-a rate enin a laihawl vel kan ni,” a ti.
Petrol-ah Covid hmaa litre khat man Rs.101.30 nen khaikhinin tuna a punna hi Rs. 2.09 in a la tlawm zawk tih a sawi bawk.
Social infrastructure & services cess lak chu thil pali – zirna tih hmasawnna, zirna in tihchangtlun leh siam belh bakah a kaihhnawih hrang hrang; mipui hriselna lam – damdawi in leh a behbawm dang siam belh leh tihchangtlun bakah thawktu lakna atan; skill development atana a zirna hmun siam belh tihchangtlunna atan; hmeichhe lam bik enkawlna – women hostel, girls residential school & polytechnic bakah maternity ward tihchangtlunna thlenga hman tur a ni a, sum hi thildanga pawhpen theih a ni lo vek tih a sawi.
Road maintenance cess chu kawng enkawlna tur bika hman tur a ni tih Lalduhoma hian a sawi a. Kan kawng buaipui a ngaih chhan ber chu a siam a tlo loh vang a ni a, a tirah tlo tak tura siam nise, heti em ema buai tur kan ni lo, tiin a sawi.
“Kan kawng siam a ni emaw buildang sak emaw tha tawk lo, a bul atanga tih that leh chi ni tawh si lo a tam a. Hemi kan kal pelh hnu, kan sawrkar hnu lama kawng laih reng reng hi a tir atangin kan endik tawh dawn. Kan hun atanga hnathawhah tlo lo leh chhia a awm a nih chuan, chu’ngah chuan mipuiin min dem thei anga, thiam loh kan chang ang,” a ti.
Mipui hriselna leh zirna atan bakah kutthemthiamna lam thil tihhmasawn zelna atan litre-ah Rs.2 i thawh ve ang u, kan tihna a ni a. Kawngpui pawh mipuiin sum kan thawh ve a ni tih kan hriat chuan kawng tlo lo siamah kan thikthu a chhe zual thei ang,” a ti bawk.
Chhiah tihpun chungchangah, an term chhungin electric bill an tipung loang tih ZPM-in an intiam a, chhiah tihpun chungchangah a dang chu intiam sa an nei lo tih chief minister hian a sawi.