CADC-a MNF hruaitute leh ZPM indawr mek

Chakma Autonomous District Council (CADC)
sorkar a nghing nia sawi a ni a, CADC-a sorkarna changtu MNF hruaitute leh ZPM an indawr mek.
CADC-a an CEM (Chief Executive Member) Rashik Mohan Chakma (RM Chakma) leh MDC tam zawk chu MNF atanga chhuak ngei tura ngaih an ni a, ZPM-a lut tura ngaih an ni bawk.
RM Chakma hian inthlanpui lo awm turah Tuichawng biala din a tum a, MNF-in he biala ding tur hian DD Chakma an tifel tawh thung. Chutiang karah chuan RM Chakma hi amah zuitute nen party atanga chhuak thei dinhmun an ding ta a ni.
“Engmah a la chiang lo, thil kan sawiho mek,” RM Chakma chuan a ti a, Tuichawng biala din a duh thu sawiin, mipui leh MDC tam zawkin an duh nia sawiin, a tlin a rin thu pawh a sawi.
CADC-a MDC 20 zinga 16-in an thlawp niin a sawi a, mi 16-te hian MLA candidate atan an duh nia sawiin, mi dang palite chuan tuna MNF candidate tur DD Chakma an duh niin a sawi.
“Engmah tihfel a awm lo a, a tlachawpin kan ngaihtuah zel ang,” RM Chakma chuan a ti a, MLA candidate a ni dawn em tih pawh ngaihtuah chawp tur a nih thu a sawi.
CADC-ah ZPM an lian lo tih a sawi a, mahse anni an lut a nih chuan a lian ang tia sawiin, ZPM-ah lut se MLA candidate a ni dawn em tih pawh, thu chiang a awm lo tiin a sawi. CADC-ah a sorkar a ding mek a, MNF sorkar a la ni tih a sawi. Chu chu party dang sorkarah a inthlak dawn em tih zawhna chu, “Thu chiang a awm lo a, kan ngaihtuah chawp zel ang,” tiin a chhang.