CADC-ah ZPM-in sawrkar siam tum

CADC-ah ZPM-in
sawrkar siam tum
Mipui thlan District Council member 20 awmna Chakma Autonomous District Council-a sawrkar tlu mekah ZPM chuan member 10 neiin, larsap hnenah sawrkarna an siam theih an thlen dawn.
2023 May 25 atanga CADC 11-na sawrkarna siamtu MNF MDC-te chuan an chief executive member Rasik Mohan Chakma, MLA chu phatsanin, kumin December 11-a CADC thutkhawmah CEM rin tawk lohna putluh a ni a, paihthlak a ni. Hemi hma zawng hian MNF-in member 14 neiin, ZPM-in member 5, BJP-in member 1 a nei.
CEM phatsantu MNF MDC 13 zinga 8 chuan BJP an zawm a, December 13 khan lawmluh an ni. Member dang 5 chuan ZPM an zawm thung a, Inrinni khan ZPM president Lalliansawta’n an party-ah a lawmlut.
CADC elected member 20 awmnaah hian tunah ZPM-in member 5 a neih sa nen MDC 10 a nei ta a, BJP-in 9 neiin, MNF-in 1 a nei a ni. Member ngah ber a nih angin ZPM hian sawrkarna siam turin vawiin, December 16 hian larsap hmuh an tum a ni.