CADC-ah ZPM sorkar piang mai thei

Chakma Autonomous District Council (CADC) sorkar hmakhua a chiang lo a, ZPM sorkar a piang mai thei. “ZPM sorkar hi a la piang lo a, mahse a piang ngei ang,” tiin tun hnaia ZPM zawmtu Kali Kumar Tongchangya, CADC-a MDC pakhat chuan The Aizawl Post a hrilh.
“Pu Thara” tia koh Kali Kumar Tongchangya hi MNF ticket-a MDC-a thlantlin a ni a, tun hnaiah amah leh MNF MDC pakhat leh BJP MDC pangate leh Congress MDC pakhatin ZPM an zawm a ni.
May ni 9-a CADC inthlanah khan bial 10-ah MNF an tling a, BJP leh Congress bial nga ve veah an tling. BJP MDC pangate leh Congress MDC palite’n MNF an zawm zui a, hneh takin MNF an sorkar a ni.
Mahse tun hnaiah an boruak a inlumlet a, BJP ticket-a thlan tlin, MNF zawm ta mi pangte chu Mizoram inthlan hnuah BJP-ah an kir leh a, anni hian tun hnaiah ZPM an zawm leh. MNF a\anga chhuak leh Congress a\anga chhuak te nen ZPM-in MDC pariat an nei ta a ni.
Sorkarna siam khawp la ni lo mah se an pun an ring a, ZPM sorkar piantir an tum thu sawiin Kali Kumar Tongchangya chuan, “A hun chu kan sawi thei lo a, ZPM sorkar chu a piang ngei ang,” a ti.
Tunah rih chuan an CEM (chief executive member) ni lai RM Chakma dinhmun ngaihchan a ngaih thu a sawi a, RM Chakma hi MLA atana thlan thar niin, MLA a nihna nge CEM a nihna zawk a kalsan dawn tih ngaihchan a ngaih thu a sawi.
CADC-ah ZPM an lian lo tih a sawi a, mahse anniho an luh avang hian an lian dawn nia sawiin, an sorkar phei chuan ZPM chu CADC-a party lian ber a ni dawn tiin a sawi.