CADC sawrkar mumal lo karah NGO-ten Governor’s Rule ngen

CADC sawrkar mumal lo karah
NGO-ten Governor’s Rule ngen
Chakma Autonomous District Council sawrkar mumal lo taka kal mek karah Chakma NGO lian pathum chuan thla ruk chhung tal an Council chu larsap-in direct-a a enkawlna hnuaia awm an duh tih larsap hnenah hian an thlen.
Mizorama Chakma NGO lian pathum – Young Chakma Association (YCA), Mizoram Chakma Students’ Union (MCSU) leh hmeichhe pawl – Chakma Mahila Samiti (CMS) chuan Ningani khan Raj Bhavan-ah larsap Gen. VK Singh (Retd) hnenah memorandum an thehlut a. CADC sawrkar mumal loh dan leh hemi in a nghawng an thlen.
CADC sawrkar mumal loh avanga 2022 November 30-a Mizoram larsap-in Council thawktute hlawh pek bak thildang engmah Council chhunga ti lo tura a tih lai zawng khan dan loin thawktu 200 chuang lak an ni hman tih NGO-te hian an thlen a. Council term hmasa leh tun term chhungah sawrkarna inthlak a awm reng a, tunah pawh hei hi an buaina ni mekin, MDC-te chu executive member post tiam bakah an lamhnaite hna pek tiamin an inthlem kual mek tih an sawi.
Hetihlai mek hian sawrkar enkawltu mumal awm thei lo hian CADC-a thawktute hlawh pek leh hmalakna dang a tithuanawpin harsatna a thleng mek tih an sawi bawk.
Heng zawng zawng tih reh a nih a, CADC-ah sawrkar kalphung mumal a kal theihnan 2022 November 30 hnulama Council-in hna a lak zawng zawng sut a, dan loa hna laknaa mawhphurtute manchhuaha hrem an nih theihnan hma la turin larsap hi an ngen a. Thla 6 chhung tal Governor’s Rule-a CADC dah turin an ngen a ni.