California ram ngaw kang nasa

Northern California ah ram ngaw kang turu tak chuan darkar khatah 20 sq km vel kang ang zel niin harsatna a siam nasa tawh hle.
Park fire hi kar khata Nilaini atanga chhuak kha niin north-east of Chico-ah ram 348,000 hectares a kang tawh a, kangmei hi thelh theihin a la awm lo niin state fire agency Cal Fire chuan a tarlang.
Kangmei thelh tur hian firefighter 2,500 velin an bei mek a, a chhengchhe bawk a, thli a nat bawk si avangin kangmei thelh a harsa hle bawk.
Kangmei hi tihpalh thil ni lova haltu awm ngei nia ngaih niin kum 42-a upa chuan Butte Country a Alligator Hole bula gully-ah a car a hal atanga intan nia ngaih niin he pa hi man a ni tawh a ni.
Kumin chhunga California-a kangmei turu ber a ni der tawh a, New York City borough panga aia zau a kang tawh a ni.
Cal Fire incident commander Billy See chuan kangmei chuan darkar khatah 5,000 acre zel a kang tiin a sawi bawk.
Thuneitute chuan thli thaw nasa lo tial tial leh temperature tlema tlahniam chu remchangah la in kangmei te chu hmun tam takah an thunun phah theih an beisei thu an sawi bawk.
Califronia Governor Gavin Newsom chuan kar kalta Zirtawpni khan Butte leh Tehama country-ah te Park fire avangin state of emergency a puang tawh bawk a.
Helicopter 16 velin kangmei hi thelh a nih theih nan vansang atangin air tanker hmangin tui an theh bawk a.
Butte hi California a kangmei rapthlak ber Camp Fire tia sawi kum 2018 ami 80 chuangin nunna an chan phahna hmun tho kha a ni.
Kangmei avang hian Cohasset khuaa cheng mi 400 te chu hmunhima thiarchhuahin an awm tawh a. Cal Fire te chuan kangmei chuan structure 134 kang chhe vek tawhin 4,200 vel dinhmun derthawng takah a awm mek an ti bawk.
US-ah hian kangmei hmun 102 velah a chhuak mek a, heng kangmei te hi west coast lamah a ni deuh vek thung.
Canada-ah pawh tun hnaiah kangmei nasa tak chhuakin Jasper National Park kang avangin Jasper khuaa building za chuang fe chu a kang chhe vek bawk a ni.