Camp Nou khelmual ngei maiah Champions League an khel leh thei ta!
Camp Nou khelmual ngei maiah
Champions League an khel leh thei ta!
Thawhlehni zan khan UEFA Champions League – League Stage khelh chhunzawm niin, Barcelona chuan kum thum chuang hnua a vawi khatna atan Camp Nou thuam thar mekah Champions League game an khel leh thei ta a, an German mikhual Eintracht Frankfurt lakah 2-1 hnehna an sualchhuak hram.
An khelmual thuamthat hnua Spotify Camp Nou tih ni taah Catalan-ho hian duh angin an mite khelmual chhungah an la hruailut thei lo a, stadium chhung thutna an la peih fel loh deuh avangin German-ho an mikhualna inkhel pawh kha a hmunah fans 38,439 lekin an thlir!
Thawhlehni zan inkhelah Barcelona an talbuai a, first half minute 21-na leka an goal khat chhuah chu chawlhlawk hmain an sut hman lo a, second half-a defender Jules Kounde goal hnih tihluh hmangin hnehna an changlet thei hram a ni!
Mikhual hmahruaina goal kha Nathaniel Brown-a ball pek atanga Ansgar Knauff-a’n Alejandro Balde buma Joan Garcia ven goal-a a tihluh a ni.
Second half minute 50-ah half-time substitute England forward Marcus Rashford thawhrah atangin Kounde chuan mualneitu team siphurh a sut a; a hnu lawk tuibur hmuam da lekah France defender bawk hian home team hmahruailetna leh an chakna goal ni zui ta a khung zui leh ta mai a, tuntuma a goal hnihna hi chu Lamine Yamal-a thawhrah a ni ve thung.
Ti hian, tlarhnung vengtu daih ni chungin Jules Kounde hian season kal lai inelna hrang hrangah belhkhawmin goal thum zet a thun tling ta!
An kawtkaia an hnehna sualchhuah hram hmang khan tum nga lai European champion ni tawh Barca chuan khelh rukah point 10 an hmu tling ve ta a, game hnih la awmah top-eight hmun luah chunga play-off round lama inpalhnawk buangbar loa last 16 lut tlang pawp turin dinhmun tha takah an la ding.
Hansi Flick-a team hian kum thar January ni 21 khian Slavia Prague an luhkhung ang a; chawlkhkar khat a liam leh rualin an kawtkaiah league phase campaign kharin Copenhagen an mikhual zui leh ang.
He tih lai hian German Bundesliga lama pasarihna dinhmun luah mek Eintracht Frankfurt erawh an match hmasa paruk atanga point li chauh an ruh phak avangin European competition atanga tla mai thei dinhmunah an ding mek.
Barcelona khelmual hmingthang Nou Camp stadium an thuamthat thu tarlan a ni fo tawh a, an ruahman dan chuan stadium thuamthar hna (redevelopment work) hi kum 2027-a zawh fel chauh tur a la ni.
Khelmual chhuat leh hna lian hnawk zualpui an zawh hnuah thla hmasa khan Nou Camp-ah hian Barcelona chuan mikhual an thleng leh thei tan ta a, Thawhlehni zan inkhel kha chu mi hnua Nou Camp-a match li an khelhna chiah niin, an la chak fai vek.
He mual a la hlui laia Champions League match an khelh hnuhnunber chu October 2022-a Bayern Munich laka sithum faia an tlawm kha niin, February 2023 khan Europa League an khel leh zuai bawk.
June 2023 atangin Nou Camp-ah pound vaibelchhe 1.1 sen ralna tur hna an tan a, an tum ber chu stadium tihchangkan leh tihtunlai (modernising) piah lama inkhel entu mipui 105,000 thut lenna tura seat tihpun a ni a, an peih fel hunah chuan khawvela khelmual lian berte zinga pakhat a ni pha tawh ang.
An home ground khar chhung khan season hnih chhung chu 1992 Olympics an nghahna Estadi Olimpic-ah mikhual tam ber an thleng a; tuna hman theiha an hawn leh tak hnu hian a chhunga mipui lut thei zat chu mi 45,401-ah an titlem rih a, hei hi thutna chhawng sang ber leh a chung an la peih fel loh vang a ni.