CAMPA Chairman nih hre lo CM…

Nimina Mizoram State Board for Wildlife thutkhawm vawi 10-na neihah chief minister chuan, tun hnaia Delhi-a a zinnaah Mizoram CAMPA Chairman a nih thu Union Minister of Environment & Forest-in a lo hrilh tih sawiin, Mizorama a buaipuitu official ten kha leh chen Chairman a nih thu an lo hrilh hre lo mak a tih thu a sawi a.
CAMPA (Compensatory Afforestation Fund Management and Planning Authority) hi India dan pakhat ‘The Compensatory Afforestation Fund Act, 2016’ hnuaia din niin, Mizoramah chuan Gazette-ah ni 18, December, 2018 khan notification tihchhuah a ni a, “The Mizoram State Compensatory Fund management and Planning Authority (Mizoram CAMPA) tih a ni. State chief minister apiang chu Governing Body Chairman tur a ni sa a, Governing Body hnuaiah hian Committee pahnih, Steering Committee leh Executive Committee a awm leh a; a indawt danin, Chief Secretary leh Principal Chief Conservator of Forests (HOD), Mizoram te chu Chairperson an ni nghal bawk.
State chhunga hmasawnna hna (project) hrang hrang thawhnaah, kha project-in ramngaw a tihchhiat hlutna ang hu, hmun danga ramngaw din lehna tura user agency-ten zangnadawmna an pek thin lo buaipuitu tur chu State CAMPA hi a ni.
State CAMPA hi a lo berah thla ruk danah vawikhat tal thukhawm tura ngaih a ni a, chief minister-in Mizoram CAMPA Chairman a nih thu an lo hrilh hre lo mak a tih thu a sawi tluk bawka mak dang leh chu, thla sarih chuang hun a kal tawh hnuah pawh, Mizoram CAMPA an la thukhawm lo cheu hi a ni, a tih theih awm e.
Nikum March thlaa Lok Sabha session laia Environment, Forest and Climate Change minister (MoS)-in ziaka zawhna a chhannah khan, State hrang hranga CAMPA Fund transfer a nih dan a tarlanah chuan, Mizoramah 2019-20 chhung khan cheng vaibelchhe 212.98 transfer anga tarlan a ni.
Hei hi eng tin nge Mizoram hian a buaipui zui tak zel a, CAMPA Fund hmuhna project-te hi eng eng nge ni a, ramngaw a tihchhiat ang hu ramngaw dang din lehna tur hi khawi hmunah te nge kalpui a nih tak tih te pawh thil hriat chakawm tak a ni awm e. CAF (Compensatory Afforestation Fund) kan hmuhte hi ramngaw dang siam nan lo hmang tangkai viau pawh ni ila, kum tina lo neihna sawn kual thin (shifting cultivation) kan nih avang hian, CAMPA hnuaia ramngaw dinte hi kan lo vat thlu leh duai duai mai ang em tihte pawh ngaihtuah theih tak a ni awm e.