Campaign phal loh hnuah party tinin Lunglei chamchilh

Campaign phal loh hnuah party tinin Lunglei chamchilh
Lunglei Municipal Council (LMC) inthlan lo awm turah campaign hun a tawp tawh a, hmun dang atanga campaign-a kalte tan LMC huam chhunga awm phal a ni tawh lo. Mahse party tinin Lunglei an chamchilh zui tho tih thu dawn a ni.
Thawhtanni tlai dar 4 khan campaign hun a tawp a, hemi hnu hian LMC pawn atanga Lunglei-a campaign-a kalte tan LMC huam chhunga awm phal a ni tawh lo. “Vote thlak hun tawp, ni 29.03.2023 tlai dar 4:00 atanga chhiar leta darkar 48, i.e. ni 27.03.2023 tlai dar 4:00 chhung hian Lunglei Municipality huam chhungah campaign theih a ni tawh lo a, hemi hun chhung hian Ward pawn lam atanga campaign tura rawn kal political hruaitute, party worker te leh campaign worker vote nei lote chu Ward chhungah an awm tawh tur a ni lo” tiin District Municipal Election Officer & Deputy Commissioner-in thu a chhuah. Mahse hei hian zawm a hlawh lem lo tih thu dawn a ni.
Lunglei atanga thu dawn danin, Lungleia campaign-a kal engemaw zatin Lunglei an chhuahsan a, engemaw zat chu haw lovin Lungleiah an awm zui.
‘MNF, Congress, ZPM, BJP, an vaiin Lungleia awm an awm a, Lungleia awm tur hi an inruat a nih hmel,” Lunglei chanchinbumi pakhat chuan a ti.
Lunglei-a awm zuite hi a hma anga zalen tak chuan an awm bik lo a, an tawm ve deuh a, an inthup ve deuh bawk tih a sawi.
Party tinte hian Lungleiah mi an indah tih hi an inhriatpui vek a, in-hek thei tur bik an awm loh avangin lungawi lohna pawh an nei chuang lo tih thu dawn a ni.
MNF leh ZPM chuan Aizawl mi, Lunglei-a awm zuiah hian ward tin viltu tur an inruat a, Lungleia an mite-ah chutiang chu an inruat bawk a, Lunglei mi leh Aizawl atanga kalte’n ward tin an vil dun zel dawn tih thu dawn a ni.
LMC inthlanah hian Nilaini hian vote an thlak dawn a, polling station 44-ah zing dar 7 atanga tlai dar 4 thleng vote hi thlak theih a ni ang. Voter mipa 19123 leh hmeichhia 21245, an vaiin 40548 an awm.