Canada laka Fifa hremna puanchhuah a ni ta!

Paris Olympic Games 2024 hmeichhe football tournament-a an match hmasaberah karliamta Ningani khan Canada chuan sihnih faiin New Zealand hneh mah se kha games khel tura Kiwis inbuatsaih lai chu Nilaini khan drone hmangin Canada coaching staff lam hian an lo enthla ru niin New Zealand football federation-in an puh a, Fifa-in a chhuichian hnuah hremna tichhuakin, Canada women’s football team hi group stage atan point ruk paihsak an ni!
Heti a nih chuan an point thum hmuh tawh paihsak an nih bakah point thum dang an la ba a! An head coach Bev Priestman chuan Ningani game atan khan team a enkawl loh tur thu a puang a, a hnuah Canada football thuneitute chuan Canada Olympic head coach atangin an chawlhtir a, chu mi chinah chuan Fifa an la duhtawk lo a, kum khat chhung eng team mah enkawl thei lo tura hremna an pe!
Drone hmanga an tum tur team training session an enthlak ruk avang khan Fifa chuan £175,720 chawi turin Canadian Soccer Association (CSA) a hrem a; CSA lamin Olympic atanga an thawnhaw tawh orthopedic spine surgeon Dr. Joseph Lombardi (unaccredited analyst) leh Canada assistant coach Jasmine Mander-te pawh Fifa chuan umzuiin, kum khat chhung football kaihhnawiha an ring rawlh thei lo turin an phuarhlawm ve nghal bawk!
Football thuneitu sang ber Fifa chuan drone hmanga Canada team-in an tumpui turte training session an enthla chu an pawl kalphung kalh tlat a nih thu thuchhuah siamin an tarlang.
Defending Olympic champion Canada hi an head coach awm loh hnuin assistant coach Andy Spence chuan a enkawl zui a, Pathianni result tarlan hman lohah France an hmachhawn zui leh.
New Zealand laka chak tawh Canada hian Group A lamah Colombia an tum leh dawn a, point ruk paihsak an nih avangin an hmabak hi ko viau tura ngaih a ni.