Canada lakah Uruguay mualpho teuh!

Canada lakah Uruguay mualpho teuh!
Football heavyweight pahnih-thum eng lai pawha kawl reng thin South American football leh North American football fiahna pakhat atan Inrinni zan khan world champion hmasaber Uruguay leh Canada-te’n Copa America third place match an khel a, hun pangngaia 2-2-a an inhnehtawk hnuah penalty shootout hmangin pawhthen an ngai a, 4-3-in Uruguay an vannei hram!
Charlotte khuaa Bank of America Stadium inkhelah hian Uruguay lamin tan atanga minute riatna lekah goal hmahruai khung mah se Canadian-ho hian goal hnihin an chhanglet khauh a! South American team hi tlawm thei mai dawna an lan hnu hun pekbelh minute hnihna a liam hma hretin Luis Suarez chuan an siphurh sutin penalty a hruaithleng hram a, tah chuan a vannei zawkah an tang zui ta a ni.
Minute riatna leka Rodrigo Bentancur-a goal an chhuah hnu minute 22-naah Ismael Kone chuan Canada siphurh sutna goal khungin, second half tawp hma minute 10 la awmah Jonathan David chuan North American team hmahruailetna goal a tilut a; dinhmun derthawng zeta an din tawh hnuah Suarez chuan Uruguay siphurh sut ve leh hramin, penalty shootout lamah Canada an vanduai ta tlat.
Spot-kick hmanga chak zawk tur zawnnaah khan Canada siphurh sutna goal khungtu Ismael Kone-a pet kha Uruguay goalkeeper Sergio Rochet chuan dansakin, Canada player dang Alphonso Davies-a’n penalty pet dan chi khat ‘panenka’ an tih hmanga ball a thawn phei pawh chuan crossbar a fuh a, goal-a kuailut zo loin a perlet a, ngui hmasa Uruguay an nui hnuhnung ta zawk a ni.
Shootout lamah pawh hian kum 2011-a Copa America trophy lo sualchhuak tawh Suarez chuan goal khung bawkin, Uruguay tana chhuihlut ve dang pathumte chu Federico Valverde, Giorgian de Arrascaeta leh goal hmahruai thuntu midfielder Bentancur-te an ni.
Uruguay boss Marcelo Bielsa chuan shootout thlen kha an phu chang chang tih sawi chungin tournament pumpui thlirin an khel tha tawk lo tih a sawi a, pathumna inchuh match-ah khan khati ngawt aia khel thei thei zawk tur an nih thu a tarlang tel.
Canada boss Jesse Marsch ve thung chuan tournament chhunga a naute khelh dan khaikhawmna chuan a tihlimin, a team-te a chhuang hle tih a sawi a, an ram thenawm pahnih United States leh Mexico-te nena an inthlentawm tur 2026 World Cup atan hmasawnna lian niin a sawi.
Bank of America Stadium, Charlotte, North Carolina, USA-a Copa America third-place play-off match-a an chak zawh tak loh hnuah Marsch chuan, “Team naupang tlang seng sawng kan ni a, tuna national team kan dinhchhuah mek hi a la upa lo a, tactical model ropui tak han keng tel tham pawh a la ni chiah lo a, team tha pui pui kan hmachhawn bawk a,” a ti.
Tukin zing khan Miami Gardens, Florida lamah champion lai Argentina leh Colombia-te’n Copa America final an khel ve leh a, result erawh tarlan hman a ni ta lo.