Cancer damdawia GST lak tih hniam rel

54th GST Council thutkhawm chu New Delhi-ah Thawhtanni khan an chairperson, Union Finance minister Nirmala Sitharaman, kaihhruaiin neih a ni a. Mizoram Taxation minister Dr Vanlalthlana pawh member a nih angin a tel.
GST hi dan pakhat, Goods and Services Tax Act 2017 hmanga India ram puma bungrua lei leh hralh leh service-a chhiah lakna a ni a. A enkawlna atan hian India ram puma state zawng zawng leh central (CBIC) department ten system software pakhat, Goods and Services Tax Network (GSTN) an hmang a ni. He system hian GST hi ram pumah a enkawl a. Council thutkhawm pawh hi sawrkar laipui leh GST Council chuan a ngaipawimawh a. Member (minister) leh official-te chu tel ngei ngei tura beisei an ni.
Tun tum thutkhawmah hian agenda tamtak zinga an sawi pawimawh zualah Mizoram pawh direct taka a khawih tel theih a awm nual a. Cancer damdawi tax rate 12% atanga 5% a tihhniam a tel a ni. Hei hian damdawi man a tihhniam phah dawn a, a bikin cancer vei tamna Mizoram mipui tan zangkhai phah tura ngaih a ni.
GST Council thutkhawmah hian Commissioner of State Tax R Zosiamliana leh addl. Commissioner of State Tax HK Lalhawngliana ten minister hi an tawiawm a ni.