Car-a mi pawng sutnaah 11 thi, a titu man nghal

Car-a mi pawng sutnaah 11 thi, a titu man nghal
Canadian khawpui, Vancouver-a mipui pungkhawm car-a pawng sutnaah mi 11 an thi a, mi thahnem takin hliam an tuar bawk.
Kum tina hman thin, Filipino kût pakhat, Lapu Lapu lawma pungkhawmte sutu nia rin mipa kum 30 mi, Kai-Ji Adam Lo chu man nghal a ni a. Tan inah dahin tualthata puh a ni.
He thil hi an ram huna Inrinni zan dar 20:14 (India-a Pathianni zing dar 08:44) vela Lapu Lapu Day hmanna hmuna thleng kha a ni a, kum tin he hin hi April 27-a hman thin a ni.
Police chuan mi sang tel an punkhawm laia thleng niin an sawi.
Kût chhimtute chuan lirthei pakhatin Vancouver chhim lama East 43rd Avenue & Fraser-a an pungkhawm chu a pawng sut niin an sawi.
“Car hi kawtthlerah khan rawn tlan tlang pawpin a rawn su buan buai a ni,” tiin a hmutu zinga mi, Abigail Andiso chuan Associated Press a hrilh.
James Cruzat-a pawhin, “Khatiang kha ka tawng ang tih ka mitthla ngai lo, TV leh movie-a kan hmuh thin ang mai a ni,” a ti bawk.
A sutu hi a bul hnaia dingten lo manin police officer-ten an la zui a ni.
Vancouver-a Lapu Lapu Festival hi Philippines leh ram danga an ram pasaltha, Spanish-ten kum 1500 chho vela an ram luah an tuma lo dangtu, Lapu-Lapu-a puala an hman thin a ni.
Lapulapu tia an sawi thin bawk, Lapu Lapu hi Philippines-a thliarkar pakhat, Mactan lal a ni.
Kum 1521 khan a sipaite nen Ferdinand Magellan-a kaihhruai Spanish sipai leh a ram mi a tanpuite chu Mactan indonaah an hneh a, hei vang hian Spanish-hovin an ram an luah tur chu kum 40 laiin a tikhawtlai.
Philippines-ah chuan tunah hian an mi ngaihsan ber pakhat niin an ram hmun tam takah a lim an dah.
Filipino sorkar chuan a hming chawiin police-ah pawh an seal-ah a lem an chuantir a ni.
Lapu Lapu Day hi British Columbia sorkarin kum 2023 khan a pawm a. Filipino-te hi he province-a ram dang mi awm tam ber a ni.
Tute nge thi leh hliam hriat an la ni mai thei lo va. Inrinnia Vancouver police chief Steve Rai-a’n thuthar lakhawmtute kawmnaah mipa, hmeichhia leh thalai tam tak an thi tih a sawi a. Kum nga atanga 65 inkar an nih thu a sawi.
A titua an puh, Kai-Ji Adam Lo-a hi mi thah kaihhnawih thubuai pariat siamsak a ni a. Rai-a chuan eng nge a tih chhan an la hre thei mai lo tih a sawi a, firfiaka chetna chu a nih a rinawm lo tih a sawi thung.