Caraboa Cup-ah Liverpool an chak

Thawhleh zan khan Caraboa Cup third round khelh a ni a, Liverpool leh Chelsea ten hnehna an chang. Liverpool leh Chelsea an chak laiin EPL club Everton chu third round paltlang zo lovin an tla ve thung..
EPL champion Liverpool hian Anfield-ah Championship club Southampton an mikhual a, 2-1 an chak. An muala an chak tum hian Reds tan Hugo Ekitike a vul chhunzawm a, chakna goal a thun. A club thar tan vul chhunzawm mah se Ekitike hi a che mawl tlat thung a, tul lo zetah red card a hmu. Southampton laka hnawhchhuah a ni hi hmun chan tuma a elpui lian Alexander Isak tan kawng hawng zautu a ni zui thei dawn.
EPL season thara la chak vek Liverpool leh Southampton te hi rinlawk aiin an inhnehtawk a, goal pawh an lut lawk thei lo. Chawlhlawk dawn hnaih minute 43-naah Reds in manto taka an lak luh Alexander Isak chuan hmahruaina goal a thun. A club thar tan bul a tan hmasak berah goal a thun nghal hian Isak hi inrintawkna sang zawk a pek ngei a rinawm. Isak goal thun hmang hian 1-0 a hmahruai chungin Reds in chawlhlawk an hmang.
Chawlhlawk hnu lamah Southampton an khel tha leh zual a, goal thun hmasa zawkah an tang. Saints tan hian Shea Charles chuan minute 76-naah goal thunin an si phurh a sut. 1-1 a nih hnuin inkhel a hmuhnawm zui hle. An muala chak ngei tuma tan khawh Liverpool tan Hugo Ekitike chuan minute 85-naah hma an hruai letna leh an chakna goal a thun. Liverpool in nipui bazarah Eintracht Frankfurt atanga £69m senga an lak luh Ekitike hi a chetha viau a, goal a thun tluang zel. Caraboa Cup a chakna goal a thun vanga a lawm luatah Ekitike hian a kawr a pelh a, mipui lam hawiin a khai lang. A kawr a phelh vangin a yellow card a hmu a, yellow card a lo hmu sa tawh bawk nen hnawhchhuah a ni.A kawr a phelh vangin a yellow card a hmu a, yellow card a lo hmu sa tawh bawk nen hnawhchhuah a ni. Mawl taka red card a hmuh vangin Ekitike hian sawisel a hlawh zui nasa hle. Tarlan tawh angin Ekitike hi a club thar Liverpool tan a chetha viau a, EPL a hriam sa Alexander Isak meuh pawh nekchhuakin bul tantu zingah a tel hial thin. Isak a rawn khel tha chho tan laiin tul lo taka red card a hmu hi amah leh amah a indangping dawn nia ngaihna lian tak a awm nghal. Liverpool hian inrinni zan khian Crystal Palace an hmachhawn dawn a, Ekitike hian Palace a hmachhawn thei dawn lo phawt. A awm loh laia Isak a lo chetha si a nih chuan Ekitike tan hian bul tan phak a har zui tawh ngei ang. |ul lo taka red card a hmuh angin Ekitike hian thupha a sawi a, Caraboa Cup-a a goal thun hmasak ber leh team chakpui a chak luat vanga phur over a nih thu a sawi.
Thawhleh zana inkhel dangah Chelsea chuan Mimualah hnehna an chang a, Lincoln City lakah si an phurh hmasak zet hnuin hnehna an chang let. Lincoln City hian team lian Chelsea lakah goal an thun hmasa teh tlat a, Robert Street chuan minute 42-naah Chelsea laka hmahruaina goal a thun a, 1-0 a hmahruai chungin chawlhlawk an hmang.
Chawlhlawk hmain an si phurh sut thei lo mah se chawlhlawk hnu lamah Blues in an si phurh an sut thuai. Tyrique George chuan minute 48-na lekah goal thunin an si phurh a sut. An si phurh an sut atanga minute hnih lekah Facundo Buonanotte chuan hma an hruai letna goal a thun a, hnehna changin fourth round an lut zui ta a ni.