Cardi B ‘Am I the Drama?’ No.1-ah debut

On Sep 30, 2025 4 0

Cardi B album thar ‘Am I the Drama?’ chu Billboard 200 (US albums) chart No.1-ah a debut a, he chart-a No.1 kai thei album pahnih a neihna a ni. Hetihrual hian Nine Inch Nails ‘TRON: Ares’ soundtrack pawh top 10-ah a debut.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla, a mal a hralhna atanga album tlukpui te belhkhawm thin a ni.
‘Am I the Drama?’ hi kar khat chhungin US-ah 2,00,000 hralhin, chung zinga 1,10,000 chu streaming (on-demand official stream maktaduai 145.72) niin, album tak tak hralh chu 88,000 a ni a, hla a mal a hralhna atangin 2,000 a tling thei bawk.
‘Am I the Drama?’ hi Cardi B full-length studio album pahnihna niin, a album hmasa zawk, 2018-a a tlangzarh ‘Invasion of Privacy’ chu chart No.1 a lo kai tawh bawka, tihian a album tlangzarh tawh pahnih te chu chart No.1 an kai thei ve ve a ni.
‘Am I the Drama?’ album-ah hian Billboard Hot 100 (US singles) chart-a No.10 kai thei ‘Outside’, No.70 kai thei ‘Imaginary Playerz’, No.1 kai thei hla pahnih ‘Up,’ leh ‘WAP’ te pawh a dah tel.
Chart No.1 hlui KPop Demon Hunters soundtrack chu 1,04,000 hralh lehin No.2-ah bawk a la awm a, chart No.1 hlui bawk Morgan Wallen “I’m the Problem” chu 90,000 hralh lehin No.3 a la ni a, chart No.1 hlui tho Sabrina Carpenter ‘Man’s Best Friend’ chu 69,000 hralh lehin No.4-ah bawk a la awm.
Nine Inch Nails pawhin tun kum 10 chuang chhunga a vawi khat nan chart top 10-a lang thei album an nei ve leh ta a, TRON: Ares soundtrack chu 45,000 hralhin No.5-ah a debut a, he chart top 10-a lang thei album pasarih an neihna a ni.
Alex Warren ‘You’ll Be Alright, Kid’ chu 35,000 hralh lehin No.7 atangin No.6-ah a insawn thar leh a, chart No.1 hlui SZA ‘SOS’ chu 33,000 hralh lehin No.8 atangin No.7 a kai thar leh ta a, chart No.1 hlui Morgan Wallen ‘One Thing at a Time’ chu 32,000 aia tam deuh hralh lehin No.9 atangin No.8-ah a insawn leh hret a, Justin Bieber ‘SWAG’ chu 32,000 hralh lehin No.6 atangin No.9-ah a tawlh a, chart No.1 hlui Bad Bunny ‘DeBÍ TiRAR MáS FOToS’ chu 32,000 tling lo deuh hralh lehin No.13 atangin No.10 a kai thar ve leh ta bawk.