Carlos Alcaraz a chak ve ta

Nilai zan khan ATP Finals khelh chhunzawm a ni a, bul tan tha lo Carlos Alcaraz chuan Andrey Rublev a hneh a, a chak ve ta nge nge. John Newcombe Group a inkhel dangah Alexander Zverev chuan Casper Ruud a hneh a, hnehna a chang zawn.
ATP Finals 2024-a bul tan tha lo Alcaraz hian a match hmasa berah Casper Ruud a hneh lo nghal. Ruud lakah a tlawm hnuin hliam teanauin a tibuai a, thawhlehni khan a practice tluan thei lo. A practice tluan theih loh vangin inelna a hmachhawn zui theih loh hlauhthawnna lian tak a awm zui nghal. Duh ang thalin practice thei lo mah se Alcaraz hian a khingpui Rublev chu set hloh lovin a hneh ta tho thung.
Alcaraz hian vawi thum a hneh zawn tawh Rublev lakah bul a tan tha viau a. Set khatna tir lamah inkhel tawk thawhkhat iau mah se Alcaraz hian break pawimawh tak a nei a, game thum hloh chungin set hmasa a la. Set khatnaah khel tha viau lo mah se set hnihnaah Russian star Rublev a khel tha ta viau thung. Set hnihnaah hian game an inlak chhawk zak zak hnuin tie-break khelh a ngai. Tie-break-ah pawh inhnehtawk viau mah se hun pawimawha che fuh Alcaraz a ding chang leh ta zawk. Inkhel hmuhnawm takah Alcaraz hian 6-3, 7-6 (10-8) in hnehna a chang. Rublev-a’n Alcaraz lakah a vawi khat nan hnehna chan a tumna chu a thlawn zo leh ta a ni.
Casper Ruud lakah tlawm tawh mah se Rublev a hneh vangin Alcaraz hian semi-final luh theihna hun tha tak a la nei. Group match hnuhnung berah vawi hnih chak zawn tawh Alexander Zverev a hmachhawn zui leh dawn a, inkhel hmuhnawm tak an lantir tura ngaih a ni. Alcaraz tan semi-final luh theihna hun tha a la awm laiin Rublev tan erawh kawng a inhawng tawh lo thung. Rublev hian Alcaraz hnehtu Casper Ruud a hmachhawn zui leh ang.
John Newcombe Group a inkhel dangah champion hlui German second seed Alexander Zverev chuan Casper Ruud lakah set hloh lovin hnehna a chang a, semi-final a hnaih leh zual sauh.
Zverev leh Alcaraz te hian hmuhnawm takin bul an tan a, set khatnaah tie-break khelh a ngai ngal hial. Tie-break-ah tawnhriat ngah zawk Zverev a chungnung ta viau thung a, set khatna a la. Set hnihnaah Zverev a khel tha leh zual a, break a nei ta nge nge. Break a neih hnuin game thum chiah a hloh a, awlsam zawka set la zui lehin Ruud lakah hian 7-6 (7-3) 6-3 in hnehna a chang zui ta a ni.
Group match hnuhnung bera intum tur Carlos Alcaraz leh Alexander Zverev te hi vawi 10 an inhmachhawn tawh a, vawi 5 ve ve hnehna chang tawhin an inhnehtawk hle. An intawn hnuhnung vawi hnihah Alcaraz hian hnehna a chang zawn a, Zanina an intum hunah Alcaraz hi inrintawkna sang zawk nen an inlan thei ngei tura ngaih a ni.