Carlos Alcaraz hmachhawn tur Tsitsipas

French Open 2024 khelh chhunzawm zel a ni a, Pathianni zan khan champion tura rinkai Carlos Alcaraz chuan set hloh lovin hnehna a chang a, quarter-final a lut. World No. 3 Alcaraz hian mipa lama player langsar zinga mi Stafanos Tsitsipas a hmachhawn zui leh dawn.
Fourth round ah hliam tenau nei chunga hnehna chang Carlins Alcaraz hi last 16 dam tha takin a inlan a, French Open 2024-a a khelh that ber hun tawngin a khingpui Felix Auger-Aliassime lakah awlsam takin a chak. US Open leh Wimbledon-a champion tawh Alcaraz hian Canadian Auger-Aliassime lakah bul a tan tha viau a, break a neih chhawr tangiin set khatnaah game thum hloh chungin set a la.
Awlsam taka set hmasa a lak hnuin set hnihnaah a khel tha chhunzawm a, game thum bawk hloh chungin set a la nawn leh. Set hnih a lak hnuin a khel tha lehzual a, set linaah break a nei zawn a, game khat chiah hloha set la zui lehin Auger-Aliassime lakah hian 6-3 6-3 6-1 in hnehna a chang a, quarter-final a lut.
Awlsam taka a chak hnuin Alcaraz hian a khelh dan chu lungawi thlak a tih thu a sawi a. Inelna neih mekah a chetthat ber tum niin, a chet phung engkim chu a dik vel vek ni maia a hriat thu a sawi. Alcaraz hian kum hmasa lama alo hneh tawh Stefeno Tsitsipas a hmachhawn zui leh ang.
Alcaraz laka fiahna hautak hmachhawn tur Greek 9th seed Stefenos Tsitsipas hian world number 35 Matteo Arnaldi a hmachhawn a, set a hloh hmasak hnuin 3-6 7-6 (7-4) 6-2 6-2 in hnehna a chang let a, quarter-final a lut. Tsitsipas hian quarter-final ah fiahna hautak a hmachhawn dawn a, a hmaa ding tur Carlos Alcaraz hi vawi nga a hmachhawn tawhah a la hneh miah lo.
Pathianni a inkhel dangah World No. 2 Jannik Sinner chuan hnehna changin quarter-final a lut ve bawk.