Carrick hnuaiah United an vul

January 17, Inrinni zan khan English Premier League 2025-26 khelh chhunzawm a ni a. Inkhel ngaihven hlawh takah Manchester United chuan an mikhual Manchester City an hneh. United hi manager lailawk Michael Carrick hnuaiah an vul nghal a, inkhel hmuhnawm lantirin, hnehna lian an chang nghal. United rualin manager thar hnuaiah Chelsea pawhin hnehna an chang ve nghal bawk.
United an vul
Beisei anga hma an sawn hleih theih loh vangin Manchester United in an manager Reuben Amorim an ban. Amorim hmunruak luah lailawktu Darrent Fletcher hnuaiah an vul zo lova, khelh hnih an tlawm zawn leh phawt. Fletcher hi Michael Carrick-a’n a thlak a, tun season chhung enkawl phawt turin Old Trafford a pan. Carrick hnuaiah United vul nghalin duhthusama thain bul an tan a, team lian Manchetser City chu 2-0 in an hneh a, point thum hlu tak an hmu.
Old Trafford-a Manchester derby khelhah mualneitu United in an khel tha viau a, an elpui lian City lakah hmuhnawm takin an inlan. Red Devils hian chawlhlawk hmain goal hnih an thun a, offside vangin hnawl a ni ve ve thung. City in hlauhawm siam bawk mah se goal an thun thei bik lova, chawlhlawk hmain goal thun thei an awm lo.
Chawlhlawk hnu lamah United an khel tha leh zual a, sawisel tur awm hauh lovin goal hnih an thun ta reng bawk. United fuh zetin an khingpuite an nawr let thut a, goal an thawkchhuak. Fuh taka an khingpuite an nawr tlang hnuin Bryan Mbeumo chuan minute 65-naah Bruno Fernandes siamsak atangin hmahruaina goal a thun.
An goal thun pawm a ni a, City lakah hma an hruai vangin United an inringtawk leh zual a, phur takin an mualah an inlan. Hmahruaina goal an thun atanga minute 11-na lekah Patrick Dorgu chu City defender te karah rang zetin a inrawlh a, Matheus Cunha cross chu goal-ah a chantir a, minute 76-naah an goal hnihna thunin, an hmahruaina a tizau.
Si hnih faia an hnufual hnuin City in an si phurh sut tum viau mah se hun tawp thlengin goal an thun thei lo tluan a. An elpui lian Manchester United lakah hreh tak chunga an tlawm a ngai. United lakah an tlawm vangin City in champion an tumnaah kawng harsa zawk an zawh a ngaih phah dawn.
United hi an muala inlan mah ni se an khingpuite hi Manchester City ber kher an nih vangin manager lailawk Michael Carrick tan bul tanna duhawm lo tak ni tura ngaih a ni. Game thun chhung United lo kaihruai zuai tawh Carrick hian team siksawiin formation thar 4-2-3-1 a hmang a, a tifuh. An mikhual City hi kawng hrang hrangah an ngam a, chak phu zawk an ni chiang hle. 2-0-a an chak piahah hian an goal thun pahnih ngawt hnawl a ni a. Dorgu, Amad Diallo, Casemiro leh Mbeumo ten goal thun theihna hun tha an nei a, si nghak chetha Gianluigi Donnarumma an paltlang zo lo hlauh thung. Hei hian City laka chak an phuzia leh chungnung zawk an nihzia a lantir.
Carrick hnuaiah phur taka inlan United hian fiahna hautak an hmachhawn zui leh dawn a. Pathianni zanah table chung bera awm Arsenal an hmachhawn dawn. United laka tlawm Manchetser City in kar laihawlah Champions League an khel ang a. EPL an khelh leh hmasak berah table mawngphaha awm Wolves an hmachhawn ve thung ang.
Chelsea an chak
United ang thova manager thar nei Chelsea pawhin Inrinni zan khan hnehna an chang a, Stamford Bridge-a an mikhual Brentford chu 2-0 in an hneh.
Manager thar Liam Rosenior hnuaia EPL an hmachhawn hmasak berah Chelsea an khel tha a, chak phuin an inlan. Stamford Bridge-a an mikhual Brenford lakah hian João Pedro chuan minute 26 naah hmahruaina goal a thun. Pedro goal thun hnu hian goal dang a luh belh thei lawk lova, Blues in hun tak chhungin 1-0 in hma an hruai.
Inkhel hmuhnawm takah goal a luh belh theih loh reng hnuin Chelsea in a tawp an khar tha zui leh a Cole Palmer chuan minute 76-naah penalty pet goal in, an goal hnihna a thun. Palmer goal thun hnuin goal dang a luh belh thei tawh lova, Chelsea chuan Brentford lakah hnehna an chang a. Manager thar Liam Rosenior enkawlna hnuaia EPL an hmachhawn hmasak berah point thum an hmu nghal. Blues hian phur takin hma lam an pan.
Parukna luah mektu Chelsea hian nilai zanah Champions League an khel ang a. Inrinni zan London derby-ah Crystal Palace an hmachhawn zui leh ang.