Carry bag man laksak vanga hremna plus Consumer Sâm
Lallunghnema
Charity Lodge
Cont: 9862288182
Consumer-te dikna leh chanvo chungchang hi kan sawi tam ta mawlh mawlh hle a. Sawi a tul a, ziah a tul a, hriat a ngai si a ni. Kan hriat loh avanva kan chàn leh kan hloh hi a nasa hle a. Thil chhut miin an hria, an vei em em a, mut mû pawh an tuah loh chang tam viau ta ve ang.
He ka article hian chhiartu chi hrang hrang a pal tlang a. Chhiatu thenkhatin an en liam puat puat thin laiin chhiartu eng emaw zat chuan an lo tangkaipui thin tih ka hriatin ka lawm hle thin a ni. |um khat chu mitthi râlnaa ka kalnaah hian kan thianpa pakhat hian ka articl-te chu a lo chhiar nasat thin thu min hrilh mawlh mawlh mai a. Ka article a lo nghahhlelh thu pawh a sawi chhuak nghe nghe a ni. Aizawl khawpui atanga hmun hla zawka mi eng emaw zatin min phone mawlh mawlh thin bawk a. An lo tangkaipui thu min hrilh bawk a ni. Heng hian min tilawm hle thin a. Phurna nasa tak ka neih phah thin a ni. Uanpui chi erawh a ni si lo.
Consumer awareness Article bâkah hian Consumer whatsApp group kan siam hi a lûn ve hle a. Member-ten an chhawr tangkai tih ka hria a. Eng lai pawhin mi 1000 chuang hi an awm reng a ni. Consumer thu hla lo changtute hi sang chuang an awm reng thin a ni. Kan hma lâknate hi tâwpsan thei kan ni lova, bansan thei kan ni hek lo! Kei chuan Pathianin tih tur min pêkah ka ngai hmiah mai a ni.
Tun tum hian sumdawng duhâm, Mizoram pawn lama mi hrem thu ka sawi dawn a. Hetianga sumdawng, dawrkai chunga Consumer Commission kut thlakna kan sawi hian tum kan nei a. Chu kan thil tum chu Mizoram a kan lo inzir vena tur a ni a. Thil tangkai tak a nih ka beisei a ni.
India rama state lian ber Uttar Pradesh khawpui Kanpur-a veng pakhat Kanpur Nagar-ah khuan District Consumer Disputes Redressal Commission a awm nual a. He Consumer Commission pakhatah hian Paper carry bag inlei luihtir chungchângah complaint a awm a. He Consumer Commission hian carry bag hralhtu dawr neitu chu cheng sing thum chuang zet a chawitir a ni.
Advocate pakhat S.K. Yadav-a chuan Kanpur Nagar hmuna V-Mart Retailed Limited-ah a mamawh thil a lei a. A hriatpui lohvin he dawr nghaktute hian he Advocate thil lei zingah paper carry bag chu, a man chhutna (total bill) ah an lo telh (ziak lut) a. Hemi chungchangah hian S. K. Yadav chu a lungawi lo hle a. V-Mart dawr neitute hnenah chuan a lungawi loh thu a thlen a. Mahse, an lo ngaihsak that duh loh avangin, District Consumer Disputes Redressal Commission CDRC hnenah chuan a lungawi loh thu chu a thlen ta a ni. Consumer Protection Act 2019 section 2(47)-ah chuan Unfair Trade Practice chungchang tarlan a ni a. He bung leh chang hi V-Mart retail limited chuan a bawhchhia a ni, tiin Consumer Commission chuan judgement a siam a. Consumer Commission judgement in a tarlan dan chuan he dawr hremna hi a na ve khawp mai. Hetiang hi judgement a ni :-
1) Paper bag man - Rs. 3.00 hi Advocate a pe let leh tur a ni.
2) Rs. 25,000/- compensation V-MART hian a chawi ang.
3) Consumer Commission-a complaint thehluhna atana senso Rs. 10,000 V-Mart hian a chawi bawk ang.
4) 7% in a chawi tur hi, a tihfel hma chu kum khat chhungin a pung ang.
Advocate complainant hian V-Mart dawrah hian bungrua Rs. 400/- man chauh a lei a. Carry bag man an lo dil (charge) a. A lungawi loh atalângin pawisa a dawng ta teuh mai a nih hi! Huaisen man a hmu e.
He thu hi Consumer Group pakhat CAG International-ah thianten an post a. Mizo tawngin ka han dah a ni. Keini helai Mizorama consumer-te entawn atan ka rawn chhawp chhuak leh a ni. Vai rama mite hi kan chhoh en zel mai! I inzir zel teh ang u.
I thil lei kha a tha lo, a chhia, a hman theih loh! Tihngaihna i hre lo a nih chuan Consumer Activist-te hnenah zualko thin rawh. Nangmah tanpui tur chein an inkau reng a ni. Consumer Organisation pakhat Centre For Consumer Education hi Consumer-te zirtir turte, hriattir turte, tanpui tur tein a awm reng a. Inthlahrung lovin i pan thei e. I tan an ding a, an kal a... an che chhuak reng a ni.
Consumer Sam tih hi a Bible tawngkam deuh mai thei e. Mahse, consumer thu hla leh zirtirna hi a rilin a Pathian thu ve riau a, Consumer Sam kan ti ve ta mai a ni. Ka inthlahrung lem lo. Consumer Sam 3-na:
Consumer Protection
1. Act 2019 ka thil leinaa mi vengtu a ni a. Ka zâm lovang!
2. Ka thil hmannaah ka chhuang zel ang.
3. Dawrkai leh Sumdawng, thil zuartuten min bum thei hek lovang.
4. Consumer Protection Rules ka nei si a.
5. Thil ka lei apiangin cash memo ka la thin ang a,
6. Hawihhawm takin ka dil thin ang.
7. Lawmthu ka sawi thin ang a,
8. Anni pawh lawmthu min hrilh thin turin ka beisei ang.
9. Ka thil lei leh hmanna-ahte chuan harsatna tâwk thin mah ila, ka duai ngai lovang.
10. Consumer ka nih anga dikna te, chanvo leh zalennate ka neih tlat avangin, Muangte’n ka bazar thin ang.
11. Huaisen takin ka bân ka phar thin dawn a ni.
12. Harsatna ka tawh châng apiangin
13. Min pui turin Consumer Activist-te ka pan thin ang a,
14. Chak tak leh huai takin ka bazar thin ang.
– Consumer is King.