Cartel nena inzawma puh Mexican mayor man

Mexico-a prosecutor-te chuan khawthlang lam, Jalisco state-a Teuchitlán mayor chu an khaw bul lawka cartel-te training awm an chhuina kaihhnawihah an man.
José Murguía Santiago-a hi New Generation Jalisco Cartel (CJNG) nena tanghovah puh a ni a, a pha thung.
March thlaa activist-ten khaw dai, Izaguirre ranch-a ruhro, pheikhawk hlui eng emaw zat, backpack leh thawmhnaw lam chi tam tak an hmuh atangin chhui hna hi kalpui a ni.
Mihring dikna chanvo humhalhtute chuan ranch hi tih luihnaa cartel zawm tura tih leh training neih tur, a hnialte an sawisak leh an hnialna hmun a nih an ring hle.
Cartel-ten tharum an thawh nasatna hmuna hetiang hmuh chhuah a nih hnuah hian mi tam tak chuan an chhungte bote thihna hmun a nih ringin finfiahna hmuh tumin an pan nasat phah hle.
Mexico-a Attorney-General Alejandro Gertz chuan kar hmasa khan sorkar laipuiin a chhui hna hi a thawh dawn thu thuthar lakhawmtute a hrilh.
He hmun hi an rama ruihhlo tawlhtu pawl hlauhawm ber, Jalisco-a inkulh, Jalisco New Generation Cartel-in an mi atana an lak luhte training-na atana an hman a ni ngei tih a sawi bawk.
Hetih mek lai hian mi an tihhlumna emaw, an hal ralna thinna emaw a ni em tih erawh finfiahna a la awm lo.
Attorney-general chuan ruhrote chu a thar a ni hlawm lo tih a sawi a, forensic test atanga a lan dan chuan ranch hal a nih hian mihring ruangte kang ral khawpa sa a ni thei dawn lo nia an hmuh thu a sawi bawk.
Gertz-a hian kum 20 liam ta chhunga Mexico-a chin hriat lohva awm mi 1,20,000 chuang zawngtu an chhungte chu he thil hmuh chhuah hian a tithinrim tak zet tih a sawi bawk.
Gertz-a hian thuneituten CJNG leh tual chhung thuneitute inkarah eng inzawmna nge awm thei tih an chhui zel tih as awi bawk.
Mayor Murguía Santiago-a man a ni pawh hi chhuina kal zel a nih thu a sawi.
Man a nih hma hian mayor hian engmah thup a neih loh thu as awi a, “Min chhui duh a nih chuan ti rawh se, ka thiang a, ka hriat chu ka sawi ang,” a ti.
Prosecutor-te erawh chuan training centre hi a awm tih a hria a, hma a la lo niin an puh thung.

Get real time updates directly on you device, subscribe now.

Leave A Reply

This website uses cookies to improve your experience. We'll assume you're ok with this, but you can opt-out if you wish. Accept Read More