Dagestan, Russia-a inkahnaah police pathum thi

On May 7, 2025 9 0

Dagestan, Russia-a inkahnaah police pathum thi
Russia chhim lama Republic of Dagestan-ah silai kengten mi an kahnaah police officer pathum an thi a, mi dang paliin hliam an tuar bawk niin an region thuneituten an sawi.
He beihna hi Thawhtannia an khawpui, Makhachkala-a thleng niin police-in car tihdin an tum laiin a ni tih Dagestan hruaitu, Sergei Melikov chuan a sawi.
Inkahna hi chawhnu dar 02:20 (India-a tlai dar 04:50) vela thleng niin interior ministry chuan a sawi bawk.
A kaptu mi pahnih chu a hmunah kah hlum ve nghal an ni a. Tual chhung thuneitute chuan mipa ve ve, kum 2000-a piang an nih thu an sawi a, engzat chiah nge inrawlh tih erawh an la hre lo va. Sorkar chanchinbu chuan a beitu dangte hi lirtheiin an tlanchhia a, zawn mek niin a tar lang.
Telegram-a video thehdarhah chuan kawngpuia police car sirah ruang a lang a. A phena silai ri pawh hriat tur a awm bawk.
Silai hmet puaktu pahnih bakah officer hliam tuarte leh civilian mite chu damdawi inah lak an ni a, an zingah hian tleirawl kum 17 mi pawh a tel a. A hnuah pakhat a thi niin sorkar chanchinbu chuan a tar lang a, thuneituten an chhui zui mek bawk.
Dagestan hi Caspian Sea hrula awm niin Muslim tamna a ni a, tun hnaiah thihna thlenna beihna eng emaw zat a thleng.
March thla khan Russian venhim hna thawktuten ISIL (ISIS) fighter nia an sawi pali, tual chhunga interior ministry pisa beih tum nia an sawi chu an that.
Kar hmasa khan Dagestan-ah hian Russia-a Federal Security Service (FSB) chuan Moscow metro leh region khawpuia Jewish sakhaw hmuna bomb kam tum nia an hriat an man bawk.
June, 2024 khan Dagestan region-ah hian silai kengten synagogue, biak in leh police an beihnaah mi 24 vel an lo thi tawh.
Hemi hma thla thum, March, 2024 khan Moscow-a Crocus City Hall-a concert chhima pungkhawm beihnaah mi 133 vel an lo thi tawh bawk.
Afghanistan-a ISIL nena inzawm, Khorasan Province (ISKP) chuan he thil hi an tih niin an chhal a. Moscow chuan finfiahna puang lem lovin Ukraine pawh an inrawlh niin a sawi.
Russia leh United States chuan ISIL (ISIS) hi Iraq leh Syria-ah kum 2019 hneh tawhah an puang a, an eng pakhat, ISKP bik hi tun hnaiah Europe, Asia laili leh Middle East-ah an che thar leh nasa thung.