Case lian pathum CBI kuta hlan turin Lokayukta ngen

ZPM chuan Mizoram Lokayukta kuta awm mek, case lian pathum chu Central Bureau of Investigation kuta hlan turin an ngen.
ZPM Legal department chuan Thawhlehni khan Mizoram Lokayukta chairperson Lalmalsawma hnenah CBI hnena hlan tura ngenna hi ziakin an thehlut a. Case pending mek pathum – Ropeway leh Skywalk chungchang (MLC No.37&39/2021), NABARD sum puk hmanga Mizorama sawrkar school thuamthat chungchang (MLC No. 41/2022) chu Anti Corruption Bureau-in investigation a la kalpui mek a; Lengpui Airport sak chungchanga complaint lut (MLC No. 42/2022) pawh Lokayukta ngaihtuah turin a inchiah mek tih sawi a ni.
Sub-section 5 of Section 19 of the Mizoram Lokayukta Act 2014-ah corruption case-te hi chhui tura Lokayukta-in order a chhuah atanga thla 6 chhunga zawh tura tih a ni a, an zo hman lo a nih chuan thla thum aia rei lo pawhsei theih a ni a. MLC No. 37&39 of 2021 (Irregularities in the construction of Ropeway and Skywalk) hi ACB chhui turin 2023 May 30 khan refer a ni tawh a. Tun thlengin investigation tih zawh a la ni lo a, investigation period, danin a bituk hun a liam tawh tih an sawi.
MLC No. 41 of 2022 (Misappropriation of NABARD loan for renovation of schools in Mizoram) chu kumin February 13 khan ACB chhui tura hlan a ni a. MLC No. 42 of 2022 (Mismanagement in the renovation works of Lengpui Airport) chu NGO pakhat – Mizoram First chuan 2022 March 14 khan Lokayukta-ah complaint an thehlut tawh tih an sawi bawk.
‘Hetah pawh hian investigation result mumal tak a la awm loa, mipui sum tam tak tihchingpenna ni ngeia lang heng case pending mek hi a zuzi mai ang tih a hlauhawm a, mipui ngaihven leh CBI ngeiin chhui se kan tih case an ni,’ ZPM Legal department hian an ti.
CBI hnena refer turin consent pek a ngai a nih pawhin, ZPM kaihhruai sawrkar chuan consent a pek nghal a rinawm avangin, Mizorama eirukna a reh theihna’n leh kan ramin hma a sawnna tura kawng pawimawh tak a nih avangin, heng corruption case pathum hi CBI kuta hlan turin Mizoram Lokayukta-ah hian ngenna an thehlut tih an sawi a ni.