Cashew nut thatna

Cashew nut thatna
Cashew nuts an ti a, keinin sazu pumpui kan ti ve mai thin. Brazil atanga khawvel hmun hrang hranga darh ta a, he nut hian taksa hriselna atana thatna a ngah hle. Cashew nut hi ei tam chuan mi ti thau thei niin an sawi thin a, mahse, a tawk chauh a ei erawhin taksa hrisel nan a tha hle a ni. Tun tumah hian Times of India health section-in chasew nut thatna ni a an sawi te kan rawn tarlang e.
1. National Centre for Biotechnology Information (NCBI) chuan zirchianna an neih hnuah cashew nut hi lung (heart) a tihrisel thei niin an sawi. Cashew nut hian cholesterol tha lo, LDL a tihniam thei a, chutih rualin cholesterol tha chi HDL a tisang ve thung. 2003 khan Food and Drug Administration chuan nitin chasew nut thum khat ei hian lung natna risk a tihniam thei niin an sawi tawh a, mahse, cashew nut chu tih al loh (unsalted) leh oil-a tihmawm loh a ni tur a ni. England Jornal of Medicine chuan chasew nut regular taka ei hian lung natna bakah cancer leh thawkna dawt lama natna risk te a tihniam thei niin an tarlang. Cashew nut hian unsaturated fatty acids, protein, fiber, vitamins, minerals leh antioxidant bakah anti-carcinogenic leh anti-inflammatory properties a nei niin an tarlang.
2. Chintawk neia regular taka cashew nut ei hian thisen lam natna chi hrang hrang risk pawh a tihniam thei. Chasew nut hian copper a pai tam a, chu chu kan taksa atanga free radicals tibotu tha tak a ni. Copper kan tlakchham chuan iron tlakchham vanga natna anemia te pawh a thlen thei.
3. Tunlaiah pollution a nasa tawh a, hei vang hian mit (eye) infection pawh a tam ta hle. Cashew nut-ah hian antioxidant pigment chak tak Zea Xanthin a awm a, chu chu mit tan a tha hle. He pigment hian direct takin kan retina-ah a lut nghal niin nutritionist Anju Sood chuan a sawi a, chu chuan kan retina vengtu layer a siam a, chu chuan Ni zung hlauhawm, ultra-violet rays lakah min veng thei a ni. Dr Anshul Jaibahrat Bhatnagar chuan Zea Xanthin tlem pawhin kum upat avanga macular degeneration awm tur a veng thei niin a sawi ve bawk.
4. Cashew seeds atanga an lak cashew oil hi vun tan a tha hle a ni. Cashew nut oil-ah hian selenium, zinc, magnesium, iron leh phosphorous a tam hle a, hei bakah hian phytochemicals, proteins leh antioxidant a pai bawk. Selenium hi vun tihriseltu leh tinalhtu a ni a, hei bakah hian cancer a veng thei niin nutritionist chuan Anju Sood chuan a sawi.
5. Intih cher duh tan pawh cashew nut a tha hle. Ei leh in inang rau rauah regular taka tam vak lo a cashew nut ei tel thin te chuan an rihna an pauh chak zawk. Journal of Nutrition-in a tarlan danin nut kan ei hian nut ei ve ngai lo te aiin BMI a tlahniam a, nut-ah hian oil tam mah se ei tam over loh chuan mi a ti thau chuang lo. Nut rau rauah pawh cashew nut hi chuan Omega 3 fatty acids a pai hnem a, chu chuan metabolism a tichak a, thau kan paih chak phah zawk thin niin nutritionist Shilpa Aurora chuan a sawi. Nuts chuan mi a tipuar rei a, chuvang chuan intih cher tumte tan ei chi tak a ni.
6. Cashew nut-ah hian dietary fibre a tam hle. Kan taksain dietary fibre a mamawh te chu oleic acid leh palmitic acid a ni a, heng fibre chihnih te hi kan taksain ama tawkin a siam chhuak lo va, chuvangin ei leh in atanga lakluh a ngai a, chasew nut-ah hian heng fibre te hi a tam hle a ni. Dietary fibre chuan chaw pai tawih lama mi a pui a, mahse, ei tam leh lutuk erawhin kua a tipuar thei thung.
7. Cashew nut ei a, cashew nut oil lu leia hnawih thin hian sam a tihriselin sam a title thei. Nutritionist Gargi Sharma chuan, “Cahsew nut oil-a copper awm hian vun leh sam pigment, melanin insiam tur a pui,” a ti. Lonoleic leh oleic acids a pai bawk avangin sam a tinungin, a tinem thei bawk.