Mizoram-a private hospital inzawmkhawmna – NGHAM chuan, Mizoram Universal Health Care Scheme (MUHCS) an zawm rih loh chhan an sawi a. Mipuiin harsatna an tawk tih an hriatin hriatthiam hram an ngen tih a sawi.
Damdawi in awmna bill chawi ngai lo (cashless) tura kalpui chuan an awmna hospital-in a tul anga enkawlin senso zawng an lo tumsak anga, damdawi in lamin sawrkarah damlo bill an thehlut anga, sawrkarin a peksak dawn tihna a ni a. Hetiang hi chuan hospital-ah nitina sum lut a awm dawn loa, nitina damlo enkawlna senso a hautak tham em avangin, ba ringawta damlo enkawl chu private hospital-ten an tlin lo tih a sawi a ni.
MUHCS hnuaia damlo enkawlna man (rate) chu tuna Mizorama private hospital-a an rate hman tlangpui aiin 50% – 80% velin a hniam zawk a, man tlawm taka damlote a ba thlau ni bawk sia enkawl tura beisei an ni tih a sawi.
‘Damlo kan enkawlna man leh room man hi phailama private hospital tam ber aiin a tlawm zawk a, chumi aia tlawm lehzuala damlo enkawl chu kan dinhmunah thil theih loh tluk a ni. Damlo enkawlna tha (quality service & care) pek kawngah nghawng tha lo a neih mai a hlauhawm. Hetianga man tlawma damlo kan enkawl chuan damdawi in tlachhia in, thawktu (doctor, nurse leh thawktu dang) hlawh pek tur kan nei lo thuai anga, hna an chan phah dawn a ni,’ a ti.
Phailam corporate /private hospital, rate sang tak hmangte nen sawrkarin MUHCS inremna an ziak thei chu tha an tih rualin, Mizoram private hospital-te tana rate chhawpsak nen a inanglo hle tih an hriat thu NGHAM hian an sawi.
Hei bakah MUHCS hnuaia damlo an enkawl tur hi phailam hospital tan chuan tlemte chauh an nih avangin, a ba thlau (cashless) a enkawl an tan thil harsa a ni loa, Mizorama private hospital tan erawh damlo an enkawl zawng zawng deuhthaw MUHCS hnuaia enkawl tur an nih dawn avangin cashless ringawt chuan enkawl an harsa dawn tih a sawi a ni.
MUHCS chungchangah inbiakna kal lai awm bawk mah se, rate leh a kaihhnawih thil dangah tihfel harsa leh ngaihtuah tur tam tak awma a lan avangin, mipui harsatna tawh awlsam taka tihtawp a nih theihnan sawrkar sum senga enkawl, sawrkar hospital-ten MUHCS hnuaiah cashless-in damlo enkawl zel se, private hospital-ah erawh phailam hospital thenkhat sawrkarin a ziahluh loh leh pawm loh (non- empanelled hospital) a an phalsak angin, damloten an bill hi MUHCS package rate angin reimburse/bill leh thei se, sawrkar sum a hek belh dawn lo tih NGHAM hian a sawi bawk.
‘Hetianga Mizoram sawrkarin a tithei a nih phawt chuan mipui harsatna tam tak a sukiang dawn a, NGHAM pawhin kan thlawp nghal dawn a ni,’ a ti.
Get real time updates directly on you device, subscribe now.
Prev Post