Catalunya tlankawngah McLaren one-two lai kan thlir liam

Catalunya tlankawngah McLaren one-two lai kan thlir liam
Pathianni khan Barcelona khawpuia Circuit de Barcelona-Catalunya lamah Spanish Grand Prix an tlan a, McLaren driver pahnih Oscar Piastri leh Lando Norris chu thleng hmasa pahnih niin, title battle kal laiah pawh anni pahnih bawk hi inbei ber an ni chho zel.
Formula One championship hmahruaitu Australian driver Piastri hian pole position atanga tlanchhuak chungin hnehna a chang a, a hnung chiahah a team-mate Briton Norris thlengin, McLaren one-two kan thlirliam zawh hian driver standing lamah hmahruaitu Piastri leh amah hnaihbertu Norris-te hi intlansiak vawi kaw zawh fel hnuah point 10-in an inthlau.
Championship lama an inthlauh loh ang bawkin Pathianni race-ah pawh McLaren driver pahnihte hi an inthlau lo a, Australian hi second 2.4-in a thleng hmasa hret a; season kal laia a vawi nga chak berna a nih rualin, Norris-a vawi hnih chak ve tawh nen McLaren hian race round kaw zawh hnuah vawi sarih hnehna an chang tling ta a ni.
Ferrari driver Charles Leclerc chuan lap ruk tlan tur la awmah safety car period zawh ruala Max Verstappen-a Red Bull car lehpelin lawmman semna dawhsan hniam ber a luah a; hremna avanga pangana ni chunga 10-naa an dah thlak leh tak champion Verstappen-a chunga hremna an lekkawh dan kha Pathianni tlaia mite sawi hlawh pakhat a ni.
A vaia four stops la tling Verstappen hi safety car restart hnuah Leclerc nen intaiin, Mercedes khalhtu George Russell nen phei chuan tum hnih ngawt an intawksir a; a tawpah a elpuite’n soft tyre an hman laiin speed muang zawk hard tyre hmangin tawp a khar a; a tum hnihna atana Russell nen an insut avang khan 10-second penalty pek niin, chu chuan a ‘overall time’ a pawthniam ta duai a, panganaa thleng kha result siamthatah chuan 10-na niin, Barcelona tlankawnga point hmu hniam ber a nih phah a, Dutch driver hi a thinrim hle nghe nghe.
Monaco tlankawnga pathumna ni pha chauh Piastri chuan intlansiak hnuhnungbera chetha tawk lo chunga Catalunya lama hnehna a chang leh thei lawmawm a tih thu a sawi.