Catholic biak in beih a nih hnua Pope-in inkahhai puan nawr leh

Catholic biak in beih a nih hnua Pope-in inkahhai puan nawr leh
Pope Leo XIV chuan Israeli-ten Gaza City-a Catholic biak in beia a chhunga inhumhim nana tawma mi pathum an thih hnuah Gaza-ah inkahhai puan ni se tih a sawi nawn leh.
Holy Family Church-a ‘sipai beihna avanga mi pathum an thi leh hlian an awm hi a lungchhiatthlak tak zet’ tiin Pope hian telegram-ah a tar lang.
Biak in enkawltu, Latin Patriarchate of Jerusalem chuan ‘Israeli sipaiten an kap’ niin a sawi a. Mi pakua an inhliam a, pakhatin hliam na tak tuarin damdawi inah a awm a, parish priest-in hliam tenau a tuar bawk.
Israel foreign ministry chuan sakhaw hmun beih a nih chu an inchhir thu sawiin Israeli sipaite pawhin thil thleng chu an en zui dawn tih an sawi.
Gaza-a sakhaw zuitu tlem tak, Kristiante hian biak in hi indona a chhuaha an chenna in a chhiat hnu atang khan awmna atan an hmang thin.
A dam lai khan Pope Francis-a khan ni tin deuhthaw a be thin nghe nghe.
Video leh thlalak darhah chuan Holy Family Church chung, kraws bul fuhin a tukverhte a chhe bawk.
TV-in video a tihchhuahah pawh Argentine parish priest, Father Gabriele Romanelli-a’n Gaza City-a Al-Ahli damdawi ina hliam tuar leh hlanga mu lai mipa a kan lai a lang.
Latin Patriarch of Jerusalem, Cardinal Pierbattista Pizzaballa-a chuan Vatican News website hnenah Holy Family Church hi tank muin a fuh niin a sawi.
“Tank-in a kah fuh tih chiang takin kan hria a, Israel Defense Forces (IDF) chuan tihpalh niin sawi mah se kan ring lem lo va, chiang takin biak in hi a fuh a ni,” a ti.
Tanpuitu pawl, Caritas Jerusalem pawhin tank mu hian biak in chung fuhin a kawt leh a chhuatah a darh them a darh nasa hle tih an sawi.
Thi zinga pahnih hi Caritas Jerusalem chuan Saad Salameh, kum 60 mi parish janitor leh pitar kum 84 mi, Fumayya Ayyad niin a sawi.
Israel foreign ministry chuan Holy Family Church tihchhiat a ni leh civil mi tuar an awm chu pawi an tih thu an sawi a. IDF-in thil thleng chu an en zui dawn a, an thil chhui chhuah pawh puan a ni danw tih a sawi.
Italian Prime Minister Giorgia Meloni-i pawhin Israel demin, “Thla tam tak chhung Israel-in civil mite a bei hi a pawm theih loh,” a ti.
Kah fuh a nih lai hian biak inah hian mi 600 vel awmnin a tam ber hi naupang an ni a, mi 54 chu enkawl ngai bik an ni bawk.