CAU-a Mizo zirlai harsatna sutkian tumnaah MSU lawm

Manipur buainaah Central Agricultural University (CAU) Imphal-a Mizo zirlaite him zawkna atan an rawtna anga Mizoram larsap leh CAU hotuten ruahmanna an siam avangin Mizo Students’ Union chuan lawmthu an sawi.
MSU Gen. Hqrs thuchhuak chuan, CAU Imphal-a Mizo zirlaite him zawkna’n hmun danga zirna an chhunzawm theih dan an dapnaah July 31-a larsap Dr Hari Babu Kambhampati hoa an ruahman angin, CAU Imphal vice chancellor Dr Anupam Mishra chu Aizawlah lokalin August 2 tlai khan MSU hruaitute nen an inkawm a. Vice chancellor hian CAU-a Mizo zirlaite harsatna chu hrethiamin a chinfel dan tur sawi ho a ni. He ruahmanna hi larsap nena nemnghet tura thu dah a nih angin inkawm zawh hian vice chancellor hian larsap a hmu lehnghal tih a sawi.
Ruahman ang chuan, institution danga zirlaite transfer chu a rei palh theih avangin, proceeding alternative atan online hmanga class registration & exam kalpui turin; RAWE (field inspection /training) chu Mizorama KVK leh ICAR-a neih theih turin; exam hmachhawn turte tan a tul anga Exam Centre Aizawl-a sawn turin tih a ni.
MSU chuan CAU-a Mizo zirlaite chu an zirna kawnga an bahlah lohna’n leh harsatna an neih lohna’n a en chhunzawm zel dawn tih a sawi a. Larsap leh CAU Imphal vice chancellor chungah Mizo zirlaite tana hma an laknaah MSU hian lawmthu a sawi a ni.