Cavaliers an chak zel

NBA 2024-25 season kal mekah Cleveland Cavaliers an khel tha chhunzawm zel a, vawi riat an chak zawn tawhin an club record an nihrual. Season tharah vawi riat an chak zawnna ni turin Cavaliers hian inkhel hmuhnawm takah an khingpui Milwuakee Bucks chu point 116-114 in an hneh. Inkhel dangah season thara la chak vek Oklahoma City Thunder pawhin hnehna an chang ve bawk.
Vawi sarih chak zawn tawh Cavaliers hian an player pawimawh Giannis Antetokounmpo ten lova inlan Bucks lakah bul an tan tha a, quarter hmasa pahnihah chungnung zawk an ni ve ve. Quarter hmasa berah point liin an chungnung a, quarter hnihnaah point kuain an chungnung zui leh a, point 13 a hmahruai chungin chawlhlawk an hmang.
Chawlhlawk hnu lamah season thara chetha lo Bucks an khel tha ve thung a, quarter thumnaah chungnung zawkah an tang. Quarter thumnaah hian point 15 zetin an chungnung ve thung a, point hniha hmahruai chungin quarter hnuhnung ber an hmachhawn. Quarter hnuhnung berah chak tumin an innawr tawn nasa hle a, point an inluh chhawk zak zak. Quarter hnuhnung berah hian Cavaliers hi point liin an chungnung thei hram a, point hniha an khingpuite lehthal hramin, hnehna hlutak an chang zui ta a ni.
Season tharah Cleveland Cavaliers hian tlawm an la nei lova, vawi riat an chak zawn tawh. Kum 1976-77 khan season tharah vawi riat an lo chak zawn tawh a, Bucks an hneh tum hian an club record an nihrual. Club record thar siam turin vawi khat chak chiah an mamawh tawh. Bucks an hneh tum hian Cavaliers tan Darius Garland chuan point 39 lai a thawkchhuak a, hei hi season thara point a thawhchhuah tam ber a ni.
Thawhleh zinga inkhel dangah vawi ruk chak zawn tawh Oklahoma City Thunder chuan an khingpui Orlando Magic chu point 102-86 in an hneh a, season thara a vawi sarih nan hnehna an chang ve bawk.
Inkhel dangah Golden State Warriors chuan an khingpui Washington Wizards chu point 125-112 in an hneh. He inkhelah hian hliam vanga match thum inlan thei lo tawh Stephen Curry chu Warriors tan a inlan a, point 24 a thawkchhuak. Warriors an chak rual hian vawi sarih tlawm zawn tawh Detroit Pistons chuan point 115-103 in Los Angeles Lakers an hneh nawlh a, an chak ve ta nge nge. Lakers an hneh tum hian Cade Cunningham chuan point 17 a thawkchhuak a, ball sawhlet vawi 11 a dawn bakah assist vawi 11 a nei tling bawk a, triple-double a puitlin.