CBI chhuitir duhah thlan bik nei lo turin kan ngen

– MNF Legal Board
CBI chhui tir tura an duhah thlan bik nei lo turin ZPM sawrkar an ngen tih MNF party chuan an sawi.
MNF Legal Board vice chairman Lalpianfela Chawngthu chuan ZPM sawrkarin mipui tanghma ngaia eirukna do a tum tak tak a nih chuan, chief minister ni ta Pu Lalduhoma’n nasa taka a lo tlangaupui tawh ang ngeia CBI hnena general consent pe nghal turin an phut tih a sawi a. CBI chhui tur leh chhui loh tur case thlan kual vel nana hun khawhral lo turin an ngen tih a sawi.
“Sawrkar phalna ziaka an neih phawt loh chuan CBI che thei lo tura siam an nih rual deuhthaw a, ZPM Legal department-in Lokayukta-a case thlan chhuah bik pathum chauh CBI chhuitir tura ngenna lehkha an thehlut nghal hian entir dang a nei lo. ZPM sawrkar leh chief minister hian an huat zawngte chauh CBI chhuitir a, an lamtang leh an mi leh sate erawh hum zel an tum zia a lantir a. Politics-a phuba lakna hmanruaa CBI hman an tum dan a lang chhuak a ni,” a ti.
ZPM sawrkarin eirukna, sum hman dik lohna leh pawikhawihna liantham CBI hmanga do an tum tak tak a nih chuan, Home department hnuaia open tender lem tih chhuah, Lok Sabha MP-in Mizorama grape chingtute chanai tur Market Intervention Scheme hnuaia 35% (cheng nuai 100 chuang) a fanghma no ei thu, buhfai supply-tu tur thlan kawngah dan kalha a chhang hniam ber ni lo, duhsak zawng an pek avanga mipui sum tam tak luangral tur chungchang, work supervisor invuaha party worker-te hnena dan kalha contract hna pek leh thil dik lo dang, ZPM sawrkar hnuaia thleng mek a awm chuan, CBI chhuitir tur hian an ngen tel nghal turah an ngai tih a sawi.
Zawhna chhangin MNF Legal Board hruaitute chuan, MNF sawrkar laiin CBI hnena consent pek kher ngai loin state police an ring tawk a, an chungah rinna an nghat tih an sawi a. Ropeway leh skywalk ah MNF sawrkar laiin hma an la a; Lengpui Airport thawmthat chungchangah pawh Lokayukta-ah hearing tum hnih nei tawhin, sum hman dik loh kaihhnawihah MNF sawrkara an hotute lakah hlauhthawnna an nei lo tih an sawi.
“ZPM-in eiruk do an aupui nasa a, thla 6-7 vel an sawrkar chhung hian chin pawr tur awm tho si a, duh duh thlan bik nei loin hengte pawh hi ti tel ve se,” Lalpianfela Chawngthu hian a ti a. Mipuia an inzawrhna en chuan, eptu lamin sum hman dik lohna lamah hma lak ngai loin anmahni an fel turah an ngai tih a sawi.