‘CBI GENERAL CONSENT’ LEH ‘INDIAN AIR FORCE (IAF) RAM LAK-SCAM..’

Lalnunmawia Pachuau

Tun hnaiah CBI hnena General Consent pek chungchangah inhnialna a lo awm thar leh hluai mai a. Lengpui leh Sihphir ram Indian Air Force (IAF) hnena hralh anga inpuhna vanga lo irhchhuak leh a ni ber. CBI hnena General Consent hi Withdraw vek anga sawi a awm thin a. Hei hi kan hrethiam chiah lo deuh niin a lang. Hemi hi chungchang hi han sawifiah leh zuai ila.
Kum 2023-a Criminal Law thar pathum a lo pian takah khan IPC te, CrPC te, Evidence Act te kha BNS, BNSS leh BSA tiin a hming thlak a ni a. BNS (IPC) hnuaia pawikhawihna bikah CBI Director chuan dated 20.06.2024 khan State/UT tin Chief Secretary hnenah July 1, 2024 hma ngeia Notification chhuah thar turin letter a thawnchhuak a, Mizoram Chief Secretary Pi Reenu Sharma hnenah pawh letter leh Draft Notification(Format) kha a thawn tel nghal a ni.
Chumi dungzui chuan Mizoram sawrkar pawh chuan dated 27.06.2024 khan Notification thar a chhuah ta a. Chutah chuan Mizoram sawrkar hnathawkte chu BNS hnuaia pawi an khawih te chhui tur chuan Mizoram sawrkar hnenah Prior Permission/Consent an lak phawt a ngai tiin dated 28.12.2023-a General taka consent an pek kha an lo her danglam ta mai a ni. Heta CBI Director-in Draft Notification a lo thawn hi han thlir ila:
“DRAFT NOTIFICATION
dated……………Whereas, the State Government of…………, in pursuance of section G of the Delhi Special Police Establishment Act, 1946 hereby gives its Consent lo the extension of powers and jurisdiction of the members of the Delhi Special Police Establishment in the whole State for investigation of the offences or classes of offences notified under section 3 of the Act, as amended from time to time, alleged to have been committed by employees of the Central Government, Central Public Sector Undertakings and Private persons (whether acting separately or in conjunction with the employees of Central Government/Central Government Undertakings). Subject, however, to the condition that no such investigation shall be taken up in cases relating to the public servants controlled by the Stale Government of except with the prior written permission of the Sale Government. All previous general consent for any other offences and consent accorded on case to case basis for any other offence by the State Government shall also remain in force.
This notification shall come into force with immediate effect.”
BNS (IPC) hnuaia pawikhawihna (offences) bikah chiah State Govt. Consent pek a ngai…
He CBI Draft Notification-ah hian BNS (IPC) hnuaia pawikhawihna bik a nihna sawi lang lo mah se, hemi draft notification chhuah tura CBI Director-in lehkha a lo thawn Para 3-na ah khan heti hian a inziak a;
“In view of enactment of new laws, in addition to the earlier notifications under section 3 of the DSPE Act for investigation by CBI of offences under different Statutes, the Government of India has issued a Fresh notification under Section 3 of the DSPE Act for offences under BNS, copy of which is enclosed herewith”.
He letter para 3-na hi BNS hnuaia pawikhawih chungchang bikah chauh Notification chhuah thar leh tura a lo tihchianna chu a ni. Para 4-ah Mizoram sawrkar hian Notification hi a chhuah thar lo a nih chuan CBI hian Mizoramah BNS (IPC) hnuaia pawikhawihna te an lo chhui theih loh thu a lo tarlang bawk. Chuvangin, dated 27.06.2024-a Mizoram sawrkarin CBI General Consent a pek tidanglama Notification a chhuah thar kha General Consent withdraw-na tia sawi hi thudik lo a ni.
Ngun takin CBI Director-in Draft Notification/Format a lo thawn leh Mizoram Sawrkar Notification dated 27.06.2024 hi bihchiang ila, a danglam lo. Draft Notification last sentence-ah hian, “All previous general consent for any other offences and consent accorded on case to case basis for any other offence by the State Government shall also remain in force.” tih a lo inziak leh kalh a. Hetiang ang chiah hian Mizoram sawrkar chuan Notification dt. 27.06.2024-ah khan, “All previous general consent for any other offences by the State Government shall also remain in force” a la ti kalh bawk. Hei hian BNS (IPC) hnuaia pawikhawihna (offence) ni lo, pawikhawihna dangah chuan State Sawrkar hnathawk pawh lo inhnamhnawih mahse General Consent kha a la dingchang reng a, consent pek a ngai lo tihna a ni..
India ramah hian BNS (IPC) dan ni lo, pawikhawihna (criminal offence) kaihhnawih hremna dan tam tak siam a ni. Entirna atan, ruihhlo drugs case kaihhnawih ND&PS Act te, ram venhimna lam kaihhnawih National Security Act, etc., bawhchhiatna te hi BNS (IPC) hnuaia pawikhawihna a ni lo. He’ng dan dang hnuaia pawikhawihna (Offences) angah hi chuan Mizoram sawrkar hnathawk pawh ni se Consent pek a ngai lo tihna ni a, General Consent kha a la dingchang reng tihna a ni. He lai tak hi a nawlpui hian kan la thliar hrang thiam lo niin a lang.
Gauhati High Court-in CBI General Consent a lo nemnghet
Burma Kuhva Smuggling chungchang case-a Public Interest Litigation (PIL) kha kan la hre vek awm e. Kha PIL No. 5 of 2022 case, dated 16th July, 2024-a thuthlukna siamah khan Gauhati High Court Division Bench, Justice Michael Zothankhuma leh Justice Marli Vankung te chuan BNS (IPC) ni lo, pawikhawihna (offences) dangah chuan CBI hnena General Consent kha a la dinchang reng (remain in force) thu para 28-ah a lo tarlang chiang hle. Para 28 hi han tarlang ila;
“28. We have also noticed that the Government of Mizoram, vide Notification No. C. 31016/1/2020-VIG dated 28.12.2023, had accorded consent to exercise powers and jurisdictions to the members of the Delhi Special Police Establishment, for investigation of offences in the State of Mizoram, in exercise of the powers conferred by Section 6 of the Delhi Special Police Establishment Act, 1946. Thereafter, though, the Government of Mizoram had withdrawn the general consent given to the CBI to take up cases relating to public servants controlled by the State Government of Mizoram, the previous general consent for any other offence by the State Government continues to remain in force, vide Notification No. C.31016/1/2020-VIG dated 27.06.2024, issued by the Vigilance Department.”
Eirûk hremna dan Prevention of Corruption Act, 1988 thlir tel ila:
Mipui ten kan ngaihven zual chu Eirukna kaihhnawih case-ah Mizoram sawrkar hnathawkte chhui turin Consent pek a ngai em tih hi a ni leh a. He Dan hi Central dan a ni tih hi kan hriat a ngai a, india ram pumpuia hman tura siam a ni. Kan hriatchian chak ber hrilhfiahna chu, PC Act, 1988 hnuaiah sawrkar hnathawkte chhui turin Consent/permission pek a ngai tih hi a ni. Mizoram State chauh ni lovin India ram puma State/UT zawng zawng a huam a ni.
He eirûk dona dan Section 17A (1) of the PC Act, 1988-ah hian, CBI an ni emaw, ACB an ni emaw, eng Investigating Agency pawh nise, sawrkar hnathawkte an sawrkar hnathawhna leh duty-na kawnga chhui an ngaih chuan phalna lak hmasak a ngai a ni. Section – 17A (1) hi han pholang ila;
“No police officer shall conduct any enquiry or inquiry or investigation into any offence alleged to have been committed by a public servant under this Act, where the alleged offence is relatable to any recommendation made or decision taken by such public servant in discharge of his official functions or duties, without the previous approval” tih a ni a.
He dan bung leh châng Section 17A hi 26th July, 2018 khan PC Act-ah hian dahluh (insert) thar a ni a, tunah hian he section dah thar hi ‘Eiruk hmang te hum tumna a ni’ tia paihthlak tumin Supreme Court-ah challenge a ni nghe nghe a, a la inchiah mêk a ni. January, 2026-ah khan Supreme Court larger Bench, Judge tam zawk ngaihtuah atan dah a ni nghe nghe. (Writ Petition (Civil) No. 1373 of 2018 (Centre for Public Interest Litigation vs. Union of India).
Lengpui leh Sihphir IAF ram lak chungchang thlir zui ila:
Tun hnaia Lengpui leh Sihphir ram IAF tana lak chungchangah inhnialnaah CBI General Consent hi a lo richhuak leh a. Party ten inbeihna atan hmanga, “ZPM Media Chairman pawhin Consent kan lo pe ang a ti; General Consent withdraw a ni daih tawh, withdraw a ni vek lo, CBI hnena Direct-a thehluh aiin Chief Vigilance Officer hnena thehluh hi a proper channel zawk’ tih hi kan buaina a la ni laih laih mai a. Kan thu chai kual danah hian chiang fek fawka mipui han hrilhfiahna thu hlin tur a awm meuh lo.
IAF ram lak danah, “Social Impact Assessment a awm lo, Notification pawh chhuah a ni lo, RFCTLARR Act, 2013 hnuaia an process dan hi a dik lo fai vek, CBI-in an chhui a ngai’” tih te hi thenkhat buaina a ni ber. Social Impact Assessment hi exempt theih a ni tih te chu kan hre vek awm e. Preliminary Notification chungchangah hian RFCTLARR Act, 2013 dan zawm famfim loh lo awm pawh ni se, Criminal Offence ni lovin civil matter a nih vangin Writ Petition hmangin High Court leh Supreme Court-ah cancel leh hnukkir vek tura ngen theih a ni.
Zangnadawmna sum chungchangah ni se, ram hlutna Rs 185/- per sq.ft anga an chhûtin 50,09,400 sq.ft-a zau a ni a, Rs 198,78,55,155/- a chhuak dik vek a, a figure engkim hmuh theih a ni a, chingpen engmah awm lovin mimal account-a a luha Account Number zawng zawng nen hmuh theihin a awm vek bawk. Hetih laia “Mantang ei an awm ngei ngei ang, thamna a inphum ngei ngei ang, CBI-in chhui rawh se” kan han tih tawng mai lai hian CBI-in an chhui theih ngeina turin sawrkar official emaw, ram hruaitu te thamna an lo lakna documents pakhat tal pawh hmuh tur a la awm lo a, thamna latu hming pakhat sawi tur lah kan hre bawk si lo chu a nih hi.
Outright Purchase kha..
Kum 2019-a Lengpui ram IAF hnena Outright Purchase tura buaipui a nih lai khan The Mizoram (Land Acquisition, Rehabilitation and Resettlement) Act, 2016 kha behchhan nia sawi a ni. Mahse kha dan kha kum 2017 khan paih bo (quashed) a ni daih tawh a, a hman theih loh tihna a ni. Hetih hun lai kum 2019 vêk hian Thuampui Helipad hi Security Forces hmun atan RFCTLARR Act, 2013 hnuaiah lak a lo ni thung. RFCTLARR Act, 2013 provision-in a phût angin Multiplication Factor -1 hmanna tur Notification pawh ni 11.9.2019 daih tawh khan Mizoram sawrkar-in a lo chhuah tawh bawk. Tin, kum 2019-a NH 54 (Aizawl to Tuipang) ram lak te, kum 2020 chhoa NH 06 (Seling to Champhai) leh NH dangte hi National Highway Act, 1956 hnuaiah lak ni mahse, RFCTLARR Act, 2013 hnuaiah an compensation hi pek vek an ni tih te hi hre tel bawk ila.
Mizoram Land Acquisition Act, 2016 nuai bona thutlukna, Mizoram sawrkar-in a appeal khan Article 371G hnuaiah ‘Ownership & Transfers of Land’ hi kan special provision a nih vangin RFCTLARR Act, 2013 hi pawm lovin dan dang kan siam thei tiin Court sang zawkah tan han khawh viau mah se, Gauhati High Court Division Bench lam chuan India Danpui Article 256 leh 257 hnuaia State sawrkar tan Parliament Dan siam leh Central sawrkar thuchhuak lo kalh a rem lohna te tarlangin leh, Central Dan siam RFCTLARR Act, 2013 aia mipui chanvo chhe zawka siam a nih vangin Danpui Article 254 a kalh a, President of India pawmpuina (assent) a awm lo bawk tiin Mizoram Land Acquisition Act, 2016 nuai bona kha dt. 30.10.2024 khan a nemnghet leh zual a. State sawrkar hian Supreme Court-ah pawh han challenge se a sal talh talh viauin a rinawm e.
Sale deed registered loh thu kha..
Party thenkhat ten mak an tih em em ram inleina sale deed registered lo te kha a mak lem lo a. VC Pass, Garden LSC-a siam chungchangah khan Sale Deed kha chai tur a ni lo a, VC Pass neitute hmingin Garden LSC leh compensation Award kha a chhuah leh vek tho vangin legal point atang chuan ram kha hralh a ni lo tihna a ni. Chuvangin hralh a nih miau loh vangin sale deed a awm thei lo a, registered theih a ni lo tihna a ni. Hetih lai hian ram neitu ten heng Garden LSC chunga thuneihna engkim nei tura Pu Rohmingliana an authorised-na ‘Power of Attorney’ hi 2nd September, 2019-ah notarised a ni a. He Power of Attorney vang hian Pu Rohmingliana hi ram neitute aiawhtu tihchianna ‘Authorized Representative’ tiin an ziak zel bawk.
‘Sale deed mumal lo chungin ZPM Ministry hnuaiah land acquisition an kalpui’ tih hi thu chai pakhat a ni leh bawk a. Sawi tawh angin VC Pass neitu te hminga GLSC a chhuah leh vek vangin dan kalphungah ram hi hralh a ni lo. Tin, MNF Ministry hun lai kum 2021 khan Defence Ministry khan ram neitu leh land rate chungchangah clarification a lo phût khan dated 24th August, 2021, 2nd September, 2021 leh 18th November, 2021 khan Aizawl DC khan ram neitu chungchangah leh land rate chungchangah engmah buaina a awm loh thu leh engkim a felfai vek thu a zu thlen tawh a, NOC pawh pek vek a ni tawh bawk. Hetianga State leh Central Sawrkar-in engkimah clarification an neih tawh hnuah hian ZPM Ministry hnuaiah khan Joint Survey neiin a area an tizim leh a, Notification chhuahin, ram neitu te hnena ram lakna man sum an pe tih hi a khaikhawmna a ni ber e.
IAF ram lakah hian Ram hlutna man land value Rs 185/- per sq.ft hi a sang uchuak lem lo. Kum 2019-ah a bul hnaia Railways ram lakah Rs 216/- per sq.ft-in an pe a, IAF ram lak hi kum 2025-ah chauh Preliminary Notification hi a chhuah vangin RFCTLARR Act, 2013 dan angin ram hlutna, current market value hi chhut phei se chuan hei ai hian a sâng zawkin a rinawm.
Tlangkawmna
IAF ramlak chungchangah hian CBI te kan han sawi hluai a. IAF tan hian Lengpui leh Sihphir ram lak a ni a, Lengpui lamah sum a tam deuh vangin kan sawi vung vak a, Sihphir lam erawh kan sawi zui lem lo a. IAF tana ram lak hi kan enghelh viau a nih chuan Defence leh Home Ministry ten Mizorama ram an lo lak tawh zawng zawng hi kan helh ve tho a ngai ang. Ram venhimna, national security tana ramlak hi Politics-a inbeihna chi pawh a ni lo a, ramin a mamawh vangin BSF, Security Forces leh Assam Rifles hmun tur te hi Mizoram hmun hrang hrangah lak a nih tawh lai karah IAF tana ram Lengpui leh Sihphir ram lak hian eng pawi nge a sawi tih hi tun thleng hian hlin chat tur hi ka la hre ve tlat lo nia..
Eng pawh ni se, Mizoram sawrkar-in CBI hnena General Consent a pek kha a la dingchang reng a. BNS (IPC) hnuai bika Mizoram Sawrkar hnathawkte pawikhawihna chhui tur erawh chuan Consent pek a ngai tihna a ni mai. BNS (IPC) ni lo, Criminal kaihhnawih Dan dang hnuaia pawikhawihnaah erawh consent pek kher a ngai lo a, General Consent kha a la dingchang reng tih hi kan hrethiam tawh em ang chu maw..