Celtic-ah Denmark captain Schmeichel

Euro 2024 khelh zawh taka a ram last 16 thlenpuitu Kasper Schmeichel khan Celtic-ah kum khat daih contract a ziak a, Manchester City lama a club-mate ni thin Joe Hart khan goal ven a bansan tak avangin Scotland ramah hian a hmunruak a luah dawn a ni.
Kum 37 mi Schmeichel hian season liamta tawp rual khan Belgian club Anderlecht a chhuahsan a, Celtic lam hian free agent ni chungin an sengluh theih phah ta a ni.
Dane hian ram tan game 105 zet goal veng tling tawhin, a team-mate tharte hi tour an kalpui mekna United States lamah a zawm ve dawn a ni.
Scottish champion a zawm chungchangah Schmeichel chuan a club thar fakin, Celtic chu khawvela football club pangngai tak zinga pakhat, hming hraw tak leh hlawhtlin tum tlat, football hmangaih rumrut niin Celtic club website-ah a tarlang a, “Celtic hi football a ni tawp mai,” a ti hial!
Leicester City-a kum 11 zet a khawsak chhung khan Schmeichel hian hriat a hlawh hman hle a, kum 2016-a rin loh taka Leicester-in Premier League title an lak nawlh tum pawh khan player thawhhlawk ber pawl zingah a tel pha nghe nghe.
King Power Stadium-ah khan tuna Celtic manager Brendan Rodgers nen hian inhrawn hmanin, 2021 FA Cup an lakdun bakah FA Community Shield an sualchhuak leh bawk.
Schmeichel hian Manchester City-ah a career bul tanin, kum 17 liamta khan Falkirk lama loan-a an chhuahtir avangin season khat chhung chu Scottish top flight-ah hian a lo khawsa ve tawh a, a hnuah Notts County leh Leeds tan hun rei lo te te ve ve a khel leh bawk.
Leicester a chhuahsan hnu khan Nice-ah season khal hmangin, nikum nipui thawt lai khan Belgium ramah a insawn a, Belgian club Anderlecht tan khan game 33 khel tlingin, match riat chhung goal chhuah loh a nei nghe nghe.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More