Celtics in champion an hnaih

Ningani zing khan NBA Final game thumna khelh a ni a, Dallas Mavericks lakah Celtics chak awn lehin, series-ah 3-0 ngawtin hma an hruai a. Celtics hian champion an hnaih leh zual.
Final game hmasa pahniha chak zawk tawh Boston Celtics hian game thumnaah chak leh ngei tumin tan an khawh. Final luh beiseina thar nei tura chak mamawh Dallas Mavericks in chak tumin tan an khawh viau bawk a, game thumnaah an inhnehtawk hle. Game thumnaah hian chawlhlawk hmain an inhnehtawk lehzual a, point khat a chungnung chungin Mavericks in chawlhlawk an hmang.
Final game thumnaah hian inhnehtawk takin bul an tan a, quarter hmasa berah Dallas Mavericks in point 31 an thawkchhuak a, point 1 in an chungnung thei hram. Quarter hnihnaah an inhnehtawk leh zual a, point 20 ve ve thawkchhuakin, chungnung zawk an awm thei lo va, Mavericks in point khata hmahruai chungin chawlhlawk an hmang.
NBA-ah vawi 17 champion tawh Celtics hin chawlhlawk hnu lamah na takin an khingpuite an nawr let a, an khel a hmuhnawm hle. Quarter thumnaah point 16 ngawtin Celtics an chungnung a, quarter thumnaa an hmahruaina hmang hian hnehna pawimawh tak an chang. Quarter hnuhnung berah point 8 ngawtin Mavericks chungnung zui mah se an khingpui Celtics lakah point 106-99 in an tlawm a, final ah chak an la nei lo.
Mavericka laka an chak nawn leh tum hian Celtics player pawimawh Jayson Tatum leh Jaylen Brown te an chetha dun viau a, point 30 ve ve an thawkchhuak. Maverick tan Kyrie Irving scored chuan point 35 lai a thawkchhuak a, Luka Doncic pawhin point 27 a thawkchhuak ve bawk. Final game hmasa pathumah an chak vangin Boston Celtics hian champion an hnaih viau tawh a, game khelh hmabak pali la awmah champion turin vawi khat chak chiah an mamawh tawh. Mavericks hneha an champion a nih chuan Boston Celtics hian Los Angeles Lakers nen champion tam lama an record siam dun vawi 17 an khum ang a, NBA-ah vawi 18 champion thei hmasa ber an ni ang.
Final game lina hi pathianni zingah khelh a ni ang a, Mavericks in hnehna chan ngei tumin tan an khawh nasa hle ngei ang.