F. Lalremsiama, Chaltlang
-- Advertisement --
1. Rualawh ka bang thei lo. Keimah tluk lek tal hian vei ula chuan tunlai thalaite hi in tling sup sup tur a ni; inelna sâng leh intihsiakna tha a ni. Inbuatsaihna tur (facilities) in nei tha em em tawh. Tumnaah chuan kawng a awm. Thi leh thau pawlha tangin ni tin zan tin hah leh chauh sawi loin theih tawp takzet chhuah rawh u. Nu leh pa leh midang tam tak, eng emaw ti tala pui duhtu in nei asin! A chhan a tha, a ril, a Thupui!
2. Mizo thalaite kan chhuang che u. Kan zahpui hauh lo che u ania. Zoram leh national leh international-ah in inzar pharh zau em em, kan tlem na a. Central Civil Services-ah in tling (lut) hlei thei lo hi kan vei tlang luai luai em a; in tan, kan tan, kan ram leh hnam tan tan han la thar sauh sauh teh u kan ti ta luai luai a nih hi. Ka sawi thiam lo naa ka ngawi thei lo.
3. Hranghlui Pu SR Vala thu kamkhat hi in hriat loh ka duh lo e. Chu chu, “Thiamin a chaldelh hi chuan a tlin ve theih mai”. IAS a tlin hlima mak ti thenkhatte a chhanna a nih hi! In thiamin a chaldelh chuan in tling dawn. In tling thar sup sup mai dawn alawm!
4. Mizote Civil Services Record rintlak neih a tul. Union Public Service Commission (UPSC) leh Home Ministry (MHA) in, kum tin Source hrang hrang atanga Mizo lutte chhinchhiahna (midangte zingah) an nei a. Chu chu Mizote a hlang hlaka dahkhawm thei turin lakchhuah a tul hmasa ang a, a ti thei tur mawhphurtu mi pathum emaw chauh ruat a tha ang.
5. Hemi lama kan history, ka hriat rengna (a chuai viau tawh) atangin ka’n sawi ang a. Kum 1955-ah JC Nampui Jamchawnga IAS (RR)-in a lut a. Ani hi kan chhuan nen inti Mizo tawk lo kan ti. Ani hi kan Mizo District chhuak a ni lo naa Aizawl-ah Addl. DC-in a lo awm a, kan lawm hle, kan chhuang bawk. A dawttu UPSC – Competitive Exam-a 1959-a IAS (RR) lut ve leh Pu Lalkhama, Mizo District ngei atanga tling hmasa ber kha a nia. IAS (RR)-ah 1961-ah Pu P. Rohmingthanga a lut ve leh. Heng hi Competitive Exam huap zau ber a ni a. Written Exam Paper a tam a, Interview an duhtui em em bawk nen; mi hmasate hi an chhuanawm em em a ni.
6. A sei lutuk loh nan ti hian vaihma deuh pahin i ti tawi mai ang. IAS leh Allied Services-ah hian luhna kawngka a awm nual (sources) kan tih kha. Sorkar hna lian thawk (officer nisa) tan Special Recruitment an tih-ah khan Pu CL Rema a tling a, Kum 1958-ah Lunglei Multipurpose CD Block PEO hna bansanin IAS SR-ah zawmin 1956 seniority pek a ni. Tin, Indian Frontier Administrative Service (IFAS) atangin Pu Lalbiakthanga leh Pu Lalhmingliana te IAS-ah an lut leh a. An seniority ka hre tha ngam lo. Anni pahnih hi Manipur State-ah leh Himachal Pradesh-ah Chief Secretary niin an pension. Pu Lalkhama leh Pu P. Rohmingthanga pawh Mizoram State Chief Secretary hna chelh phakin an awm bawk. An tha them thawm hle a ni.
7. Kan thupui sir khatah kan cheng rei ta deuh a, All India Services (State Cadre neiho) leh Central Services danglamna te sawi tawh loin “MIZOTE” lamah UPSC Competitive Exam-a tling Mizo hote ka hriatrengna chau deuh tawh hmang bawk hian sawi leh ila. Kum 1961-ah khan Pu P.Rohmingthanga IAS (RR) rual khan Pu Thangkhuma Tochhawng IPS (Postal) leh Pu Thatchema Chinzah IA&AS -ah mizo pathum an tling. 1962-ah Pu KC Lalvunga IFS (Foreign) leh Pu SR Vala IAS (RR)-ah, Pu Rokunga Chongthu IPS (RR)-ah, Pu Ngurchhawnthanga Pachuau (N.Pachuau) IRS (Income Tax) Mizo pali an tling. 1963-ah Pu Thanglura Zadeng IPS (RR)-ah, Pu Doungel (Manipur lam) IRS-ah, Mizo tling tlem ta hret naa 1964-ah Pu Lalhmingliana Saiawi IAS (RR)-ah, Pu RV Lalmawia IRS (Income Tax) te, Pu Lalfakzuala IIS te, Pu F. Pahnuna IRS (Excise & Custom) te, Pu Thangkima Cherpoot IPS (RR) te – Mizo panga an tling leh ta. Kum 1965-ah phei chuan UPSC Results-ah Mizo 10 (sawm) hming a lang: Lalfakzuala, F. Pahnuna, Thangkima Cherpoot, Lalchuangliana, Thantluanga Tochhawng, Lalzarliana, Lallunghnema Khawlhring, Lalawia, Denghnuna, F. Lalremsiama. Manipur lama unau Kuki/Thado pathum K. Kipgen, Thangkhawchuon Misao leh Vumkhawsei Changsan te nen – Zohnahthlak 13 lai kan lang phak ta hial! Heti zat hnuailam panin kan tla thla ta riai riai a. Tun hnai eng emaw chhung phei chu Thei rehin kan reh ta. Heng Central Civil Services te hi Sorkar Rorelna ruhrel leh thahrui pawimawh tak an ni miau si a. IAS & Allied Services-a kan awm theih loh chhan hi chhut ngun fe a tul ta a ni.
8. Chemtatrawta thawnthu kan sawi, hre lo Zofa kan awm kher lo ang. A bul ber, tui ti chip chepa chem tattu leh a thinurna hrikthlak dan leh a hnu zela che zuiho chet dan DIK LO vek hi/kha i ngaihtuah ve ngai em? Engah nge Chemtatrawta kha Hmathlir tha tak neiin, thil awmdan leh dinhmun (situation) hisapin, a SECURITY Strategy tha tak nen a inbuatsaih loh? Pawikhawihtu kaikuang bitum loa Kha-um zamna Rawpui fik ta daih kha. Dawn ve teh lung a awi lo. Kum 1940 – 1970 chhung kha Mizo Literature Golden Age tih ka chak ut ut. Thu leh Hla Kungpui te vul lai i ti ve thei em? Zirna/Lehkhazir thiamna (Education) lam lam te kha kan mawhpuh (bel) dawn elo? Ka phal lo tawp. Kum 1940 – 1970 khan Sikul Building a ropui lo, Zirtirtute Qualification pawh chuti tho. Mahse thu leh hlaa Zoram awi nuamtute vanglai a thleng miau si. Khatih hun chho zelah khan Zofate UPSC Exam chauh loah pawh Assam ram College tha thaa a thiam ber ber te lo lianin, Gauhati University-ah te Bengali leh Assamese hnampui umphaka lehpelh hun lai te kha! Unau duh tak te u, in tang ulh nge tan in la tak tak lo? SUPER IAS tih hial Rimawi Khawvel leh Lawilo Dawrpui lam zawk hi em ni min hnuk kang zo lotute hi?
Kan inenfiah a hun ta a ni!!