CENTRAL POLITICS TLEM THLIR LAWK ANG

Bihar election lo awm turah boruak a sosang:

Dr. Lalmalsawma Nghaka
Kulikawn

Bihar-ah hian roll revision an nei a, SIR (Special Intensive Revision) an ti a. Opposition lamin fair lo angah an ngai a. An duh lohna lantir nan July 9, 2025 khan total bandh “Bihar Bandh” an tih pawh an nei zo tawh a, a hlawhtling hle. Bihar-ah hian INDIA bloc an langsar tulh tulh a ni.
Harsatna an tawh chanchin tlangpui
1. ECI lamin Voter tam tak an paih:
The Hindu chanchinbuin a sawi danin ECI hian voter awm sa, an chenna hmun an hriat loh 43.93 lakh an awm an ti a, tin, enumeration form pe lo voter 29.62 lakh an ni bawk an ti. A vaiin voter 73.55 lakh chu Bihar draft electoral roll atanga exclude tum an ni. He draft electoral roll hi August 1, 2025-ah chhuah a ni ang a, claims/objections chu September 1, 2025 thleng tih theih tiin thu an chhuah.
2. Category-Wise Breakdown: 
Voter 66 lakh lai mai paih turah chhut an awm ve leh bawk a, 22 lakh chu thi tawh an ni a, 7 lakh registration double an ni an ti a, 35 lakh hmun danga awm emaw hmuh theih loh emaw an ni a. News thenkhat chuan, voter 52 lakh remove an ni a, thi tawh hi 18 lakh niin, 26 lakh te chu hmun danga awm an ni a, 17 lakh te chu duplicates an ni tiin an sawi.
3. Rahul Gandhi-a te ngaihdan:

INDIA bloc, Congress kaihhruai chuan Special Intensive Revision (SIR) hian genuine voter 52–74 lakh te chu exclude an tum tih an sawi. Rahul Gandhi chuan “vote theft” tiin a sawi a, voter 52 lakh chu an chenna hmuna awm tawh lo an ni a, 18 lakh chu thi tawh angin an sawi tih a sawi bawk.
Haryana, Maharashtra leh Karnataka inthlan thlir let lawk ang:
1. Haryana inthlan 2024-ah khan EVM rigging awm angin central lama Congress hotuten an sawi a. Seat hmuh dan kha BJP 48 leh Congress 37 a ni a. Chawhma lama EVM an chhiarah Congress lam an chak a, chawhnu lama EVM an chhiarah BJP lam an chak ve leh thung a. Chawhma lama chhiar, Congress chakna EVM te kha 60-70% vel battery a awm a. Chawhnu lama chhiar EVM te kha nilenga vote thlak nana an ‘on’ tawh hnuah battery kha 99% vel a la awm thei cheu a. Congress hotuten EVM rigging an puh a nih kha!
2. Maharashtra election-ah kha chuan Lok Sabha election June, 2024 atanga Assembly election November 2024 inkar (thla 5 chhung) vote punna kha 40 lakh vel daih a ni a, 2019 election atangin 32 lakh velin a pung bawk a, Rahulji-in thil thleng pangngai a ni lo tiin a lo sawi tawh a ni. Shirdi-ah phei chuan building pakhatah voter thar 7000 vel an awm a, fake voter registration an ringhlel nasa a ni. Tin, constituency 50-ah BJP lam kha 47 an tling a, vote nei thar 50,000 vel an awm a ni. Rahulji te hian nasa takin complaint mah se, ECI lam hi an insawifiah a, thu an titawp zung² a ni.
3. July, 2025 chhoa a campaign-naah Rahul chuan Karnataka LS inthlanah khan Maharashtra leh Bihar angin thil dik lo a awm a, Maharashtra-a voter thar 1 crore aia tam a awm thu leh Bihar-a voter 52 lakh vel paih a ni ve leh angin Karnataka LS inthlanah khan vote 60,000 chuang tih chingpen a ni a, a lem/suak te leh sorkarin voter a paih luih sak te awmin, 100% proof a nih thu a sawi a. Hei hi ECI lam chuan a hun laiin complaint mumal a awm lo tiin an pha ve leh bawk a ni.
Tuna Bihar election Nov. 2025 lo awm turah hian “vote theft” a awm tiin Rahul Gandhi a tlangau leh ta viau a. Revision neih hi a hun chhung a rei lo a, Voter ten aadhaar leh epic an neih sa ring lovin a tharin an endik a. Congress lam hian voter nuai 55-74 vel an paih turah an riruat a, an chet nasatna constituency te hi INDIA bloc an thatna hmunte a ni tiin an sawi.
BJP hian an lal reng theih nan hmanraw chikim an hmang a ni thei a, Russia rama Vladimir Putin-a’n lal reng a tum ang maiin hma an la a ang hle. Hetih lai hian an hmanrua ber RSS nen nasa takin an inti thiam lo mek a, engtin nge an kal zel dawn a la hriat loh.
TLANGKAWMNA
A tlangpuia ngaihtuahin BJP an zuih tulh tulh a, Congress leh a thawhpuite hmasawnna a lang chho zel a ni.
(Next-ah chuan Rahul Gandhi-te buaipui laipui ber CASTE CENSUS lam tihlan kan tum leh dawn nia)