Central YMA-in kawng siam mek enfiah Kawng siam dan lungawi thlak loh an ti

Central YMA hruaitute chuan Vairengte leh Sairang inkar kawng siam mek leh PMGSY hnuaia Hlimen leh Lungleng inkar kawng siam mek chu Inrinni khan an enfiah. NHIDCL hnuaia contractor-ten Vairengte atanga Sairang thleng a chhe zual thawmthat hna an thawh mek chu Central YMA vice president Prof Lalnuntluanga hoin an enfiah a. Contractor-te hnathawh mek chu a lungawithlak loh hle niin an sawi.
Vairengte atanga Sairang in kar hi NHIDCL hnuaiah contractor pathumin open tender-a chhangin kumin July atang khan an thawk tan a, nakkum July-a zawh tur a ni. Central YMA hruaitute chuan tun thlengin contractor-te hian an thawh tur ang zatve pawh an la thawk lo vek nia an hmuh thu an sawi a. NHIDCL hotute leh contractor-te chu nakkum fur ruahtui tlak hma ngeia an hna zo vek tura hrilhin, an vil zui zel tur thu an hrilh.
Central YMA hruaitute hian kumin November 8-a helai kawng siam dan ena an kal hma ai chuan hna pawh an lo thawk ve viau chuan an hria tih an sawi a. Hei aia nasa zawka chaka hna thawk turin contractor-te hi an chah a. Karleh Thawhtanni atangin Sairang lam atanga hna thawk tan ve nghal turin Jain Infratech Company hotute pawh hrilh an ni.
Sub-Hqtrs YMA Kolasib hruaitute, Awithangpa Group YMA hruaitute bakah YMA Khamrang Branch hruaituten Central YMA hruaitute hi an tawiawm a. Hun remchang hmasa berah Krismas hma ngeiin a hmunah tlawh leh an tum tih an sawi.
Inrinni vek khan Mizoram PWD-in PMGSY hnuaia Hlimen leh Lungleng inkar kawng an siam mek chu Central YMA hian an president R Lalngheta hoin an enfiah bawk a. Kawng siam hnathawktu contractor chu a thawk muang nia hriat a nih avanga en an ni a, contractor hi chak zawka thawk turin an ngen.
YMA chuan thil tha an duh a, chak tak si, tha tak si a thawh an duh a. Helai hna thawktu pawh Mizo tho a nih avangin kan ram tan theihtawp chhuah ve turin an duh, an thawk tha duh dawn lo emaw an thawk tha thei dawn lo emaw a nih chuan, midangin thawk mai se tih chu YMA chuan an tih thiam ve dan a ni mai, tiin Central YMA president hian contractor a hrilh.