Central YMA chuan Myanmar atanga Mizorama raltlan zinga an hruaitute chu Zirtawpni khan kokhawmin an infuihthar a; Mizoram hmun hrang hranga Myanmar raltlan hruaitute an tel. Central YMA general secretary Prof. Malsawmliana chuan tun dinhmunah Myanmar atanga sahimna zawnga awm mek mi 27751 an awm tih sawiin, raltlante chu an awmna khua leh vengin inkaihhruaina an siam leh sawrkar thuchhuah ngaipawimawha zawm theuh turin a chah.
Raltlan zingah ruihtheih thil leh sualna danga inhnamhnawih chu dim an ni dawn lo, tiin, dan hmanga hrem zel an nih tur thu a sawi a. Sawrkar ruahman anga temporary ID card nei vek tur leh India khua leh tui chauhin an neih theih Aadhaar card, EPIC, driving licence adt. neih tum talh lo turin a chah a ni.
Central YMA president Lalhmachhuana pawhin boruak muanawm tak hnuaia kan awm theihnan mahni camp-ah theuh lo infuihthar turin a chah a. Hnam bil leh chi bil boruak siam lo turin a chah bawk.
Aizawl bawrhsap Er Lalhriatpuia chuan sawrkar inkaihhruaina hrang hrang a sawi a; senior SP CID (SB) Stephen Lalrinawma’n India citizen chauhin an neih theih document neih tum lo turin a chah a, ruihhloa sumdawnnaa inhnamhnawih lo turin a chah. Excise & Narcotics assistant commissioner VL Vura Ralte pawhin raltlante chu ruihhloa inhnamhnawih lo tur leh ruihhlo do kawnga thawhpui turin a sawm. Raltlan hruaitute pawhin thu an sawi a ni.
He hunah hian Aizawl leh Mizoram hmun hrang hranga Raltlan camp-a awm hruaitute, raltlan pawl hrang hranga hruaitu leh Chin Hills-a MP leh MLA engemawzat an tel a, an vaiin mi 60 chuang an tel.