Central YMA leh MJA an inkawm Nem tak ni loa kawng siam en tum

Central YMA hruaitute leh Mizoram Journalists’ Association chu hmalakna tur leh thawh dun theihna hrang hrang sawiin an inkawm a. Hetihlai hian vawiin – Inrinni hian CYMA chuan Kawnpui leh Khamrang vela kawng siam mek an en dawn a, nem dem dem taka en tum an ni lo tih sawilawk a ni.
Central YMA office bearers tharte chuan Zirtawpni khan MJA Gen. Hqrs. member-te an kawm a. Ram leh hnam tana pawimawh leh hma lak ho theihna tur hrang hrang an sawiho. YMA kumpuan – Ruihhlo Do kaihhnawih pawh sawi niin, hma lak dan tur tha nia hriat sawikhawm a ni.
Central YMA president R Lalngheta chuan na zawka ruihhlo do kawnga hma lak a nih theihnan Home minister nen kar thar lamah an inkawm dawn a. Ramri hnaih lam YMA – Sub Hqrs, Group, Branch pawh sawipuia kalchilh an tum tih a sawi. “Ruihhlo zuarte dim dek deka hmachhawn a hun tawh lo. Dan hnuaiah kan ti anga, a tul dan azirin na takin kan kal ang,” a ti.
National Highway 306/06 kawng siam an en dawn tih a sawi a. Nem taka zuk en an tum lem lo tih a sawi lawk. “Kan ram a ni a, kan lifeline a ni bawk. Pawl hrang hrangin hma an la a, sawrkar pawhin minister meuhin riahchilhin hma an la a, hmasawnna hmuh tur a tam chuang lo. Company-ten an duh ang tawka ei rawn zawnna atana min hmang hi a fel loa, a tul angin hma kan la dawn. Mizoram kawng siam tlaka kan ngaih loh an awm a nih chuan min tin san mai tura tih thlengin kan sawiho tawh a ni,” R Lalngheta hian a ti.
MJA president C Lalrambuatsaiha chuan ruihhlo do kawngah kal nat deuh a ngai nia a lan thu a sawi a. Tharum thawh an thlawp tihna niloin, ruihhlo ti rem tak tak tur chuan tun aia khawng deuh kan mamawh nia a lan thu a sawi. Ruihhlo do a tul rualin, YMA kalpui reng – ram leh hnam humhalh kawngah pawh hma lak nasat a ngai hle nia an hriat thu sawiin, Central YMA-in hma a laknaah MJA chuan a thlawp dawn a, chutihrualin sel a tulnaah chuan a sel thin dawn tih a sawi lawk a ni.
Sawihonaah MJA member-te chuan ruihhlo do, kawngpui siam leh ram leh hnam tana tha tura chet kawnga tul leh tha nia an hriat an sawi a. Zawhna chhangin Central YMA hruaitute chuan, FCAA 2023 chu hun hmasa lam atangin Mizorama hman tha an tih loh thu an lo sawi tawh a, an dinna a la ngai reng tih an sawi. Tunhnaia environmental NGO leh civil society hmalaknaah an tel tha thei lo thin a, chutihrualin a tul angin Central YMA CEC leh NGO Coordination Committee hnuaiah hma lak dan ngaihtuah zel a ni dawn tih an sawi.