Ch Chhunga H/S-in jubilee lawm

Govt. Ch Chhunga High School chuan an kum 50 tlin, Golden Jubilee chu Ningani khan Luangmuala an school tualah an lawm.
Hmanpuitu School Education secretary Dr Lalzirmawia Chhangte chuan zirna chu a zau zawnga sawi chuan, pianhlim atanga thih ni thleng huam a ni a, kan nun pumpui hi zirna a ni, tiin, zirlaite chu exam-a pass tum ngawt loa, thiamna tak tak neih tum a, an zirlai chu midangte hrilhchhawng thei khawpa chik a, chhawrtlak leh hmantlak nih tum turin a chah.
Zirtirtute pawh zirtir dan ngai reng hmang loa, tunlai mila inher rem thei turin a chah a. Ram changkangten an tih theih ang chu ti ve thei turin a fuih.
Hmanpuitu dang School Education director Lalsangliana chuan sikul enkawl kawngah sawrkar kut nghak ngawt loa, thawktuten an thawh theih tam tak a awm tih a sawi a. Hlawhtlinna chu vawi lehkhata neih mai theih a ni lo, tiin, zirlaite chu hrehawmna leh harsatna inbawhbeh tir loa, chhel taka kal a, inchher puitling turin a fuih a ni.
School hming putu, Mizoram chief minister hmasa ber Ch Chhunga nupui Rothangi (99) pawhin hmanpuiin thu a sawi a. Hun hmasa lama school-in harsatna a tawh dan te, Ch Chhunga hming dai loa siamtu an nih avanga a lawm thu te a sawi.
Govt Ch Chhunga High School hi 1973 February 14 khan Ropaiabawkah mithahnemngaiten an din a, 1975-ah tuna a dinna Luangmualah hian sawnin, 1991-ah sawrkar sikula hlankai a ni. He sikul atang hian mi 1229-in HSLC an pass tawh a, kum 1996 ah HSLC exam centre a ni a, school 12 vel kumtin an exam thin. Kum 2022-ah Samagra Shiksha atangin higher secondary school-a hlankai a ni a, tunah hian thawktu – high school leh higher secondary school-ah 21 awmin, zirlai 108 an awm a ni.