CHAMPHAI – CHAWNCHHIM LAM VE THUNG AW

Lalhmangaiha Sailo
Holy Cross Bakery
9436360275

Gandhi Memorial High Sikul, Champhai chuan kumin kumtawp lam hian PLATINUM JUBILI hman an tum a ni maw!! An Sikula lo lut tawh te hmun hrang hrang ami la dam awm te siniar deuh tawh thlengin an dap chhuak mek ni awm tak a ni. Keini ang Kum 80 ral kai tawh, tu khaw hriat pawh ni lo, veng kilkhawra khawsa, an sikula lut ve tawh ka nih pawh engtin nge an hriat zawk ni. Pu HT Vanlalsawma Headmaster leh Pu Ngurhmingliana Sailo Sr teacher te an lo leng a, in chung sang Green House a bawngek lei tha chawkkawia thlai ka lo ching mek chu min rawn pawhchho in, tute an nih pawh hre hek suh i, enge in duh le? tiin kut pawh tuaifai hman meuh lo chuan ka lo chibai a. An Sikul GM High Sikul-in Platinum Jubili an hman dawn thu min rawn hriattir pahin Souvenir an buatsaih a, thuziak ve turin min sawm zui a. Ka lehkhabu MAMIT KAN VANGLAI tih te chu an Sikul Library ami tur nen an ak chhuak ta nghe nghe a.
Jubili hmang tura buaipuitute hi an fakawm khawp mai. Alumni Whatsapp group te hawngin Ex Student an hriat leh an Contact theih apiangte chu Add zelin chu chuan Ex Student valai deuh te leh chhangchhe tawh thlengin a chawkphur a. Jubili thawhlawm thlengin pek theih a nih thu te an han hriattir leh zel phei chuan, a chawk phur zual ni tur a ni. |hian hlui, classmate chanchin pawh inhre zui phak tawh lote thlengin a chawk tho. Group thlalak hlui te phawrhin, an lung a leng thar a, hmun kilkhawr leh ram hla tak tak atangtea rawn tel ve ngei tumte pawh an tam phian mai thei. Hei erawh ka sawi duh, he hunah hian nihna inchen lo leh khawsak phung thlenga inang lo leh inchen lo kan tam khawp ang. Tu mahin kan tun dinhmun anga inen loin kan Student nih lai rilru leh dinhmun kan Life kha hriain hman tum theuh ila, kan hlimin kan lung te pawh a leng thar ngei ang le. Pu Thanseia Headmaster-in vawiin chu sap tawng hman vek tur, Mizo tawnga inbiak loh tur a tih ni ang te kha sawi ni se.
Khaw’nge GM High Sikul kum rei lo te chhunga Sikul tha leh chhuanawm tak, mithiam leh hlawhtling tak tak te chherchhuaktu ni tura theihtawpa bul lo tantute – CHAMPHAI (CHAWNCHHIM) khaw chanchin leh mi chengte nunphung leh khawsak dan ka hmuh leh hriatte ka’n tarlang dawn teh ang. A ngaihnawm lam aiin hetih hun lai hre pha lo leh thangthar zelte tan pawh ni ta se! Hetiang lam record (History) fel tak kawlte an lo awm a nih pawhin a tibuai lo turah ngai ila.
Hetih hun lai Champhai khua hi In 500 vel tur an ni ang. Khawdungsei tak Jamadar Vengsang tlang chhip atanga mualdung thla Pu Ralauva leh Pu Saienga Sailo SIB te In (tuna Pu Laikhuma In) inkar hi a ni a.
Mak angreng tak mai chu he khua Champhai (Chawnchhim) khua hi tunhma Sailo lal ten tlang hrang hranga khua an awp (neih) thin ang khan LAL pali (4) in zuk awp thung tlat a.
VENGTHLANG LEH CHHUNGTE KHUA: Hei hi Pu Luseia fapa Pu Lalthankima F/o Chawngdinga, Tuikhuahtlangin a awp.
KAHRAWT: Pu Thangtea F/o Chawngbuanga, Lal niin a awp a.
VENGSANG : Pu Thangluaia Pu Sanga Pain a awp thung a.
JAMADAR VENG : Pu Zathuama F/o Kapchhunga, Ex DSP, Ramhlun-in a awp thung a. Jamadar veng hi Gurkhali Lal awp thin a ni a, an thlahte awptu tur an awm lo nge Mizo Lalin awp tawh se an ti. Lal tur an thlang a, Pu Zathuama an thlang a. Rei vak lo Lal hmanin Lal banin a zui ta a ni.
Heng Champhai khaw Lal palite hian an ramri leh khua leh tui neih zat lam chu ka hre lo. Khua leh tui nei hrang Lal an ni na in, mak tak mai chu Tlangkhat Lal pakhat awp ang maiin lungrual taka awmin ro an rel ni tur a ni. Chhiatni thatni thlengin an intawiawm tha a, keini naupang Rual pawl thin deuh tan pawh han hriat hranna vak tur a awm lo. Tunlai kan khawvel boruak nen chuan a inang lo khawp mai, hei hi kan veng chin a ni tia poster leh signboard invuakthlaksak lam a awm lo. Village Council khata awm angin GM High Sikul lungrual leh phur takin bul an tan a. Sikul hmun tur tlang te rawt hniamin veng tinte an inhnatlan chhawk thin.
Kum 50 Golden Jubili an hman hnu, chhiatni thatnitea hmun hrang daih atanga Champhai ka tlawh tawh hi chuan hman leh hman lo hian GM High Sikul hi ka tlawh hram thin. Ka lung ti leng em em leh mitthla pawha ka han hmuh thin chu maw, khang hun laia thahnem ngai taka High Sikul tha leh chhuanawm tak ni tura a hun laia bul lo tantute leh, Zirtirtute, Managing Board thlengin hmuh tur an awm tawh lo, mual an liam zo tawh. A hmun a hma erawh dang lo, vawiin Platinum Jubili leh GM High Sikul dinhmun te hi hmuin han tel ve hlawm se zawng an hlimin an lawmin an lung pawh a leng ve ngei ang le.
Hei hi kan khawvel kalphung leh awmdan chu a ni. Eng hunah emaw chuan ka chanchinte hi miten engtin tak la rawn sawi ve ang maw!!! Mite lung tileng leh ngaihnawm ti taka an la rawn sawi tur hnutchhiah thei hlawm ila a va duhawm dawn em!!
HMASAWN TUM LEH TAIMA TAK KHUA AN NI
Champhai hi Mizorama Middle Sikul awm hmasa tlemte zing ami a ni a. Pu Vanlallawma (Lalzika Pa) hotu hmasa niin tualchhung naupang lut pawh an tam a, High Sikul din chhoh an nih pawh hian Tualchhung naupangten an bawhzui zel a. Headmaster leh zirtirtu indaih leh tha tak tak an neih hnu atang phei hi chuan naupang puitling leh hlawhtling tak tak an chher chhuak teuh a ni. Ei leh barah an intodelhin thalai lehkhazir lote pawhin rual an el a. Leilet buh tui tak tak an thar teuh thin.
KHAW LUNGRUAL TAK AN NI
Veng dungsei inkarkik tak tak ni mah se, chhiatni thatni te hian an intawiawm tha thin khawp mai; khawi vengah pawh chhiat tawk awm se zanthum dawn hi nula tlangval ten khawhar lenpuiin an zai thin. Khawhar lenkhawm zai hi an thiam em em a, Tv/Pu Biakvela Kahrawtin khuang a put tawh ngat phei hi chuan tuman hawn zai rel lovin zan dar 10 thleng dawn dawnin tui takin an zai khawm thin. Tun hunah te hian la ni ta zel tak maw!!! Jubili hun chuan hetiang Lenkhawm hi hruaitu hmasa kaltate puala buatsaih ni se. Upa C Chawngdinga Tuikhuahtlang leh Pu Lianchungnunga Ex Teacher Chanmari ten khuang puin han hruai se zawng Hmanlai Chawnchhim nula tlangval te tluk pha chiah lo mah ila kan lung erawh a lengin kan hlim khawp ang le. A sei lutuk dawn, heng hun lai hre pha lo leh hre pha deuh riai ruai tan a rem leh part 3-ah kan la chhawnzawm dawn nia.