Champhai district-a raltlan tanpui dan tur sawikhawm

Champhai district-a raltlan tanpui dan tur sawikhawm
Champhaia sawrkar hotu leh pawl hrang hrang inhmukhawm chuan raltlan buaipui dan tur leh tanpui dan tur chu Thawhlehni khan district bawrhsap Mohammad Aaquib an sawiho.
ADRA (Adventist Development and Relief Agency) India project manager Sujan Chandra Das chuan ADRA hmalakna leh thil tih powerpoint presentation hmangin a sawifiah a. Doctors without Borders atangin ramri leh tulna hmun hrang hrangah raltlan an enkawl dan a sawi a ni.
Pawl hrang hrang – ZEP (Zoram Entu Pawl), HI (Humanity and Inclusion) leh JRS (Jesuit Refugee Service) hnathawh ngaihthlak a ni bawk a. An ni hian tanpuina – eitur, zirtirna, health camp an pe thin. Hemi zawh hian heng pawl, sawrkar hotute, VC leh tlawmngai pawl tha taka an thawhho theih dan tur, raltlan tam zawk an enkawl theih dan tur, biometric authentication chungchang sawiho a ni.
Champhai district-ah hian November 4 thlengin Myanmar atanga raltlan mipa 4256 leh hmeichhia 4328, kum 18 hnuailam 5078, an vaiin 13662 an awm mek.