Champhai kawng NH-06 a tlang

Khawzawl atanga National Highway (NH) – 06 pawhtu kawngpui, Sapsakei Lamlian (Loch Road) laih mek leivungin kawngpui a hnawh pin avanga khawchhak tlangdung zin veivakten harsatna an tawh sukiang turin inbiak a ni a. Kawng pawh hi tih tlang a ni tawh.
Khawzawl Vengthar VC leh NGO te chuan Artlangpeng Khawzawl Vengthar atanga Tuimuk panna kawng, Shri Balaji Construction Company (SBCC) in NH-06 an laihna lamah an tichhiat chu kum hnih liamta atang khan siamtha tura vawi tam an ngen hnuah pawh chhuanlam an nei zel a, sawrkar thuneitute hnenah pawh an thlen tawh tih an sawi. SBCC-in May 14-a kawng laitlang tura an intiamna an bawhpelh avangin May 16 atang khan VC leh all NGO hian kawng sial hnatlang an nei tan a, NH hi lirthei kal theih lohin a hnawh ta tih sawi a ni.
Khawzawl bawrhsap K Lalrohlua chuan Inrinni zing khan leivungin NH-06 a hnawh dan a hmuna a enfiah hnu ah NHIDCL leh SBCC aiawhte a ko a. SBCC ah hian thutlukna siam thei helaiah an awm loh avangin NHIDCL executive director hnenah a tul anga hma la turin lehkha a ziak a ni.
Bawrhsap hmalaknain company lamin helaia hna thawk turin excavator pakhat an dah a, hna a tan nghal a ni. Kawng siam leh leivung tih fai a nih chhungin khawchhak lam atanga Aizawl pan tur leh Champhai lam pan tur lirtheite chu Khawzawl khawchhungah an tlan luh a ngaih dawn avangin lirthei kal velin harsatna an tawh loh nan signage siam turin Khawzawl SP a hrilh bawk.
Champhai district bawrhsap James Lalrinchhana pawhin NHIDCL leh SBCC koin harsatna chinfel dan tur a sawipui a. Harsatna thlenna hmun chu district dang ni mah se, Champhai district a nghawng tel avangin harsatna chinfel thuai dan ngaihtuah tura ko a ni tih a sawi.
Bawrhsap hian SBCC thuneitu sang zawk pawh phone hmanga bia in, harsatna chinfel dan tur a sawipui a. Khawzawl bawrhsap nen pawh inberawn zelin ruahmanna an siam dun a. Hemi ang hian Pathianni zing khan leivung hi thenfai a ni a, zing dar 9 velah lirthei zawng zawng kal theihin laih tlang a ni.
Khawzawl Vengthar atanga Tuimuk panna kawng pawh hi vawiin, May 20 atangin SBCC-in a lai tan anga, excavator an thawh chhuah pui anga, operator an neih remchan loh avangin Khawzawl bawrhsap-in operator leh leivung paihna tur a lo ruahman dawn a ni.