Champhai Police-in kumin bikah kuhva tawlh bag 9201 man tawh

On Dec 18, 2024 21 0

Champhai Police-in kumin bikah
kuhva tawlh bag 9201 man tawh
Kumin chhungin Champhai Police chuan dan loa kuhva rah ro tawlh bag 9201 an man tawh a, black market-a an hralh thin dan anga chhut chuan nuai 890 chuang hu a ni.
Champhai Police hotute chuan Thawhlehni khan an district-a dan bawhchhiatna thil thlenga case an ziahluh dan leh bawhzui a nih dan thlirler pahin, hunpui atana inbuatsaihna ruahmanin an thukhawm a. Kumin January to December 16 thleng khan IPC case 160 leh non-IPC case 224 neiin, a vaiin case 384 ziahluh a ni a. 2023 January atanga December 16 inkar khan IPC case 115 leh non-IPC case 200 an nei a, a vaiin case 315 ziahluh a ni. Nikum aia case ziahluh tamna hi 45 a ni.
Kumin January atanga December 16 thleng khan dan loa tawlh kuhva rah bag 9201 (kg. 652790) an man a, an hralh thinna anga chhutin Rs.89,690,300 hu a ni.
ND&PS Act hnuaiah case 172 ziahluh a ni a. ND&PS hnuaia thil man chu – heroin kg. 47.1186, methamphetamine kg. 190.642, Crystal meth kg. 34.155, ganja kg.27 a ni. Zu, beer leh wine/juice man an nei nual bawk.
Kumin January – November chhung khan traffic dan bawhchhia 663 leh lirthei 690 manin, an sum chawi tlingkhawm chu Rs. 769200 a ni.
December 18 atangin tiamchin sawi lawk loin ‘No Tolerance’ hman an tum a. Champhai town huamchin an vil ang.