Champhaiah Career Expo & Job Fair

Champhai zirlaite leh thalaite an hmalam hun kawhhmuhna leh hna hrang hrang chungchang inzirtirna hunpui, ‘Champhai Rahbi – Career Expo & Job Fair’ chu Ningani khan Govt Champhai College hmunah neih a ni.
A hawnna hmanpuitu Champhai bawrhsap James Lalrinchhana chuan an district thalaite kawng kawhhmuhtu leh hna hrang hrang chelh chho tura an inpuahchahna kawngah hmanraw pawimawh tak a nih ngei a beisei tih a sawi a. He program neih a nih theihna tura hma latu minister Pu TJ Lalnuntluanga leh a huaihawttu department-te chungah lawmthu a sawi.
Mizoram Startup Mission programme manager Ruth Chuauthangpuii’n ‘Entrepreneurship & Startup Support’, DLEO Champhai L Rosangliana’n ‘Skill Sector Opportunities for Youth in Mizoram’, ZoCareer director RK Hnuna’n career guidance chungchang te an zirtir a ni.
‘Champhai Rahbi – Career Expo & Job Fair’ hi Mizoram Startup Mission Planning & Programme Implementation department, Labour Employment Skill Development & Entrepreneurship department, Mizoram Youth Commission leh Govt Champhai College tangho buatsaih a ni a. October 5 & 6 chhung awh tur niin, stall hrang hrang ruahman a ni. Stall hawn chhan hrilhfiaha kawng kawhhmuh bakah hna lak leh placement thlengin an ti thei a. Foreign-a thawk duh tan pawh an pui thei a ni.