Champhaiah chibil pawl din khap

Champhaiah chibil pawl din khap
Sub-Hqrs YMA Champhai chuan Champhai district chhungah Myanmar raltlan awmte chu chibil pawl din lo turin a hriattir.
Sub-Hqrs YMA Champhai-in an district huamchhunga Myanmar raltlan awmte tana inkaihhruaina a tihchhuahah chibil pawl din a khap bakah sawrkar leh khawtlang duh loh thil laka inhnamhnawih lo turin a chah. Chutianga inhnamhnawih man an nih chuan, jail-a dah an nih pawhin hremna an tawrh zawh hnuah Myanmar-a thawn haw an nih tur thu a sawi a. Ruihhlo hmanga sumdawnnaa inhnamhnawih, roreltute hnen thleng kher lo pawh an khaw lamah thawn haw an ni dawn, tiin, chutiang mi chu an thlalak leh an hming social media-a puanzar an ni zel dawn tih a sawi
Raltlan reng reng an awmna YMA branch-a inziaklut vek tura a tih bakah Myanmar sawrkarin a siamsak identity card an kawl chu an awmna YMA branch-a thehlut vek turin a ti a. Ram dan leh vengchhung dan an zawm lo a nih chuan an chungah eng ang rorelna pawh thleng se an sawibuai thei lo, tiin, an awmhmun an sawn duh a nih chuan an awmna hmasa YMA branch hriattir turin a ti.
‘Branch hruaituten an insawnna tur branch-ah ziakin an hriattir tur a ni. Branch tinin raltlan chhinchhiahna inangtlang neih tur a ni a, thla thum danah mahni huamchhunga raltlan neih zat report thin tur a ni,’ a ti.
Sub-Hqrs YMA Champhai chuan an huamchhungah sawrkar atanga phalna lak ngai chi sumdawnna reng reng raltlanten kalpui lo tura hrilhin, an pualin lirthei hmanga sumdawnna kalpui lo tur turin a ti. In hmun lo ram neih an phalsak loa, lo nei an awm hriat a nih pawhin an neih lohna tura hmalak a nih tur thu a sawi.
‘Raltlang zingah chhiat tawk an awmin an awmna venga vui tur a nih chuan mikhual vuia vui tur a ni anga, chhiatni fund erawh khawn tur a ni,’ an thuchhuak hian a ti.