Champion kawng zawh lo Arsenal

Nilaini zan khan English Premier League (EPL) 2025-26 khelh chhunzawm a ni a, inkhel awmchhunah Arsenal chu table mawngphaha awm Wolves lakah an chak zo lova, champion kawng zawh lohin champion loh kawng an zawh a ngaih a ni. Wolves laka chak zo lo Gunners hmahruaina a derthawng tak zet tawh a ni.
Table-a hmahruaitu Arsenal hi table mawngphahah awm a, tlahniam ngei tura ngaih Wolves hmachhawn turin Molineux Stadium-ah an lenglut. Mikhual an nihna hmunah bul an tan tha a, goal an thun hma hle. Fuh taka ball an inpek kual hnuin player tangkai Declan rice chuan fing leh fuh takin ball a vawrh lut. Rice ball vawrh luh tha tak hi Bukayo Saka chuan hnaite atangin a tauh goal a, minute 5-na lekah hmahruaina goal a thun.
Chak tura rinkai zawk Arsenal in hma taka goal an thun vangin chak tur zawk a chiang nghal ruaka ngaih a ni a, Gunners hian harsa lo takin point thum an hmuh a rinawm hman hle. Saka goal thun hnu hian goal dang an thun belh zui teuh viau a, Wolves si nghak Jose Sa chuan tha zetin save a nei a, an team hnufual tam lutuk tur a chhanhim. Hemi hnu lawk hian Wolves pawhin goal thun theihna hun tha an nei a, uiawm takin an hun tha an hlah ve bawk a. Chawlhlawk hmain goal dang a luh belh thei lo.
Chawlhlawk hnu lamah inkhel a hmuhnawm chhunzawm a, Arsenal an khel tha chhunzawm. Defender Gabriel Magalhães ball pek fing tak chu defender vek Piero Hincapié chuan minute 56-naah tha takin a pet goal a, an goal hnihna thunin, an hmahruaina a tizau. Table mawngphaha awm lakah si hniha hma an hruai vangin Arsenal dinhmun a tha viau tawh a, chak chiang tawha ngaih a ni hman. ‘Hun tawp hamrik a rik hma chuan chak zawk a chiang lo’ an tih thin ang ngeiin Wolves an beidawng duh lova, goal hnih thawkchhuakin tlawm an pumpelh ta daih a, thilmak an thlentir.
Table-a hmahruaitu Arsenal lakah goal hnih chhuah tawh mah se table mawngphaha awm Wolves an beidawng duh chuang lova, huaisen takin an mikhualte an nawr chhunzawm. An huaisen leh an thawhrim rah an seng a, goal an thawkchhuak ta nge nge. Wolves tan hian Hugo Bueno chuan mawi zetin a pet kual lut a, minute 61-naah goal thunin an si phurh a sut then.
Goal an thun vangin Wolves an phur thar a, an khel tha zui hle. Wolves an khelh that laiin Arsenal an chiai a, an talbuai tehtlat thung. Champion mamawh, champion chaka tuihal Arsenal hian champion an chak luatah hunkhirh an tawnin an chiai a, an talbuai tlat thin. Hun pawimawh, chak an mamawh em em laiin inrintawkna an hloh tlat thin. Chu chu Wolves lakah pawh an tuar zui leh a, hun pek belh tawp dawn tepah ho takin an chesual a, goal an chhuah.
Wolves hian an si phurh sut ngei tumin tan an khawh a, hun pek belh tawp dawn hnaiah an che fuh ta nge nge. Wolves hian ball an vawrh lut a, Arsenal defender Gabriel Mangalheas leh si nghak David Raya ten ball an inchuh vangin Wolves in goal thunna hun remchang an nei. Minute 90-naa mualchhung lut Ricardo Calafiori chuan goal line atangin ball dek hman mah se goal a lut tur a dang thei bik lo. Wolves tan hian Hugo Bueno huan minute 90+4-ah goal thunin an si phurh a sut ta nge nge a. Arsenal nen 2-2 a inhnehtawk zuiin point khat hlu tak an hmu zui ta a ni.
Wolves laka chak zo lo Arsenal hian khel tam zawk chungin point 5 chauhin hma an hruai tawh a. Champion loh kawng an zawh.