Champion lai Liverpool an chak zel

English Premier League-ah champion lai Liverpool an khel tha chhunzawm a, inrinni zana Merseyside derby hmuhnawm takah 2-1 in hnehna an chang a, point 9 hmu tawhin table chung ber an luah chhunzawm zel. Liverpool an chak laiin team lian Tottenham in hnehna an chang zo lo thung.
Anfield-a Merseyside derby hmuhnawm takah mualneitu Liverpool an khel tha viau a, darkar chanve an khelh tlin hmain goal hnih an thun hman. Inkhel tan atanga minute 10-na lekah Ryan Gravenberch chuan Mohamed Salah siamsak atangin hmahruaina goal a thun nghal. Hma takah goal an thun vangin Arne Slott a team in inrintawkna sang zawk an nei a, phur takin an mualah an inlan. An muala khel tha tak Reds tan hian nipui bazar laia an lak fuh tak Hugo Ekitike chuan minute 29-naah an goal hnihna a thun belh zui leh a, si hnih faia hmahruai chungin chawlhlawk an hmang.
Chawlhlawk hnu lamah Everton in an si phurh sut ngei tumin tan an khawh a, goal pawh an thun thuai. Minute 58-na lekah Idrissa Gueye chuan goal thunin an si phurh a sut then. An si phurh an sut then vangin Toffees hi phur viau mah se hun tawp thlengin goal an thun belh thei tawh lova, an hmelma lian Liverpool hneh lovin an tlawm.
Everton lakah an chak leh tak vangin EPL 2025-26-ah Liverpool in an khingpuite an la hneh vek a, table hmahruaitu an ni chhunzawm zel. Hetihlai hian an khelh hmasa panga atangin Everton chu vawi hnih an tlawmna a ni ta a, vawi hnih chakin draw vawi khat an nei tawh bawk a, point 7 hmuin Manchester United chung chiah pakuanaah an awm mek.
EPL champion lai Liverpool in nipui bazar laiin hming langsar tak tak an la lut. British player manto ber ni turin Alexander Isak an la lut a, manto takin Florian Wirtz an la lut bawk. Heng player manto tak takte hi manager Arne Slot chuan bul tantir lovin bench a luah lum tir hmasa thung. Hetihlai hian Eintracht Frankfurt atanga an lak luh striker Hugo Ekitike erawh an chhawr tangkai viau thung a. Ekitike hian a club thar tan EPL-ah goal thum a thun tling der tawh a ni.
Tottenham an chak zo lo
Inrinni zana inkhel dangah pathumnaa awm mek Tottenham chu mikhual an nihna hmunah an chak zo lova, Brighton nen 2-2 in an inhnehtawk. Brighton lakah chak zo lo mah se Tottenham hian an chung chiaha awm Arsenal chu point khatin an lehpel a, pahnihnaah an inhlangkai tho thung. Pathianni zana Arsenal result-ah Spurs hi an innghat thung.
Brighton hian an mikhual Tottenham lakah an khel tha viau a, goal hnih an thun hmasa. Brighton tan hian Yankuba Minteh leh Yasin Ayari ten chawlhlawk hmain goal a thun. Spurs tan minute 43-naah Richarlison-a’n an si phurh a sut then hnuin hun tawp dawn hnaiah Brighton an vanduai a, Jan Paul van Hecke own-goal hmangin Tottenham in an si phurh an sut zawh theih phah. An mualah uiawm taka an chak zawh loh vangin Brighton hian khelh nga atanga point nga hmuin 14-na an luah a ngaih phah.