Champion lai Mexico an chak nghal
Concacaf Gold Cup 2025 khelh tan a ni ta a, inkhel hmasa berah champion lai Mexico chuan hnehna changin, point thum an hmu nghal.
He inelnaa champion lai leh champion ngun ber ni bawk Mexico hian California-a SoFi Stadium-ah Dominican Republic an hmachhawn. Inkhel hmuhnawm takah dar kar khat chuang hretah goal nga ngawt a lut a, Mexico in 3-2 in hnehna an chang. He inelnaa vawi 9 ngawt champion tawh Mexico tan hian Edson Álvarez chuan minute 44-naah hmahruaina goal a thun a, si khat faia hmahruai chungin chawlhlawk an hmang.
Chawlhlawk hnu lamah Mexico an khel tha chhunzawm a, inhnaih chilh takin goal hnih an thun. Mexico tan hian Raúl Jiménez chuan second half tan atanga minute hnihna lekah an goal hnihna a thun a, an hmahruaina a tizau. Goal hnih an chhuah zawn hnuin Dominican Republic tan Peter Federico chuan goal thunin an si phurh a sut then. An khingpuite goal thun zauh hian Mexico a chhaihkawlh thung a, goal an chhuah atanga minute hnih hnu lekah César Montes goal hmangin an khingpuite an chhang let a, 3-1 in hma an hruai ta chiah.
Dominican Republic hian Mexico lakah tlawm pumpelh ngei tumin tan an khawh nasa zui hle. Edison Azcona chuan minute 67-naah goal thunin an si phurh a sut then zui leh. Azcona goal thun hian a fuih phur hle a, tlawm pumpelh tumin tan an khawh zui nasa hle. An si phurh sut zawh tum viau mah se hun tawp thlengin goal an thun belh thei tawh lova, inkhel hmuhnawm takah champion lai Mexico in 3-2 in hnehna an chang zui ta a ni.
Gold Cup chu
CONCACAF Gold Cup hi Confederation of North, Central America and Caribbean Association Football huam chhunga ram hrang hrang mipa team inelna a ni a, North America, Central America leh Caribbean khawmual atangte in ram 16 an inel thin. He inelna hi kum 34 kal ta, 1991 atanga neih tan a ni. He inelnaa champion ngun ber ber vawi 9 champion tawh Mexico an ni a. Mexico hi champion lai an ni bawk.
Kum 2025-ah hian (Group A) – Mexico, Costa Rica, Suriname, Dominican Republic, (Group B) – Canada, Honduras, El Salvador, Curaçao, (Group C) – Panama, Jamaica, Guatemala, Guadeloupe, (Group D) – United States, Haiti, Trinidad and Tobago leh Saudi Arabia te champion tumin an inel dawn. Inelna hlu takah champion ngei an tum hlawm. Final hi July ni 6-ah khelh tura ruahman lawk a ni.