Champion ngun ber Armed Veng an tla

LBS Suzuki CYMA Football 2025 chu thawhtanni khan khelmual hrang hrangah khelh chhunzawm a ni a, he inelnaa champion ngun ber Armed Veng chu round of 32 lut zo lovin an tla. Armed Veng an tlak lai hian champion tura rinkai zinga mi Rupublic Veng in awlsam taka hnehna changin round of 32 an lut ve thung.
Inter Branch YMA football tournament-ah vawi nga champion tawh a, champion ngun ber ni mek Armed Veng chuan RG Stadium ah Zobawk Vengthar an hmachhawn. Inkhel hmuhnawm takah hian Zobawk Vengthar tan T. Malsawmzuala chuan minute 35-naah hmahruaina goal a thun. Chawlhlawk hma si an phurh sut tumin Armed Vengin tan an khawh nasa hle a, veteran striker Lalfakzuala’n goal thun theihna hun tha tak nei bawk mah se uiawm takin a hun tha a hlah. Fakzuala hian tauh luh theihna hun remchang nei bawk mah se goal zawnah a tauh thei lova, Armed Veng in an si phurh an sut thei ta lo a ni.
Vawi nga ngawt champion tawh Armed Veng hnehtu Zobawk Vengthrar hian Upper Republic an lo tawh a, Armed Veng laka chakna goal thuntu Aizawl FC winger Sawma Tlangte hian Upper Republic lakah goal 11 ngawt a lo thun tawh nghe nghe a ni. Vawi nga champion tawh a, an jersey-ah pawh arsi panga chhu kai ngat Armed Veng chuan a vawi ruk nan champion an tumna chu an tipuitling zo ta lo a ni.
RG Stadium-a inkhel dangah Tlangnuam leh Chanmari West te hun pangngaiah 2-2 in an inhnehtawk a, penalty shoot-out ah Chanmari West in 6-5 in hnehna an chang a, round of 32 an inhlangkai. Inkhel dangah Sialhawk chuan an khingpui Kolasib, New Diakkaw chu 4-1 a hnehin round of 32 an inhlangkai ve bawk.
Vawi nga champion tawh Armed Veng an tlak lai hian vawi khat champion tawh leh champion tura rinkai zinga mi Republic Veng chuan 1st Bn MAP Ground-a an khingpui Samlukhai chu 6-0 in an sawp. Republic tan hian senior player F. Lalrinpuia a khel tha leh viau a, goal hnih a thun. 1st Bn MAP Ground a inkhel dangah Serchhip Vengchung in 2 – 1 in Durtlang Leitan an hneh a. Inkhel hmuhnawm takah Chhinga Veng leh New Serchhip Chhekhnai te hun pangngaiah 2-2 a an inhnehtawk hnuin Chhinga Veng chu penalty shoot-out ah vannei zawkah an tang a, 5-4 a hnehna changin round pf 32 an inhlangkai.
Thawhtanni khan Chite Play Ground leh MSSC Ground, Muallungthu-ah inkhel pathum ve ve a awm bawk. Chite Play Ground-a inkhelah Bethlehem in 2 – 1 in Ramhlun Vengthar an hneh a. Ramthar Vengin 5-2 a
Chhingchhip Mualpui an hneh laiin Muallungthu leh Leitan Ramthar te hun pangngaiah 2-2 in an inhnehtawk a. Leitan Ramthar in penalty shoot-out ah 3-1 in hnehna an chang.
MSSC Ground, Muallungthu a inkhelah Salem Veng, College Veng leh Kawngpui Vengthar ten hnehna changin round of 32 an inhlangkai ve bawk. Inelna neih mek hi inkhel a hmuhnawm sawt hle a, entu an pung chak viau bawk.