Champion tura rinkai Liverpool

Football chungchanga thil hrang hrang zirchiang thin CIES (International Centre for Sports Studies) Football Observatory chuan English Premier League 2025-26-ah champion theihna chance nei tha ber chu Liverpool an nih thu an tarlang.
CIES in an tarlan danin EPL champion lai Liverpool hian season kal mekah champion theihna chance 28.9% an nei a. An hnuai chiaha awm Arsenal in champion theihna chance an neih chu 18.8% niin an tarlang ve thung. CIES hian Manchester City aiin Chelsea an dah sang teh tlat a, Chelsea in champion theihna chance an neih hi 16.2% ah ngaiin pathumnaah an dah a. EPL-ah vawi 10 champion tawh Manchester City chu palinaah dahin an champion theihna chance nia an hriat chu 14.4% a ni. Hetihlai hian English club ropui Manchester United in champion theihna chance an neih chu 2.6% chauh niin an dah ve thung a. He thu hi United tantute tan chuan chanchin hriat nuam lo tak a ni ngei ang.
Liverpool hi manager thar Arne Slott hnuaiah an champion nghal a, pahnihna Arsenal nen an inkarah point 10 a tla zep. 2025-26 season hmachhawn turin sum an seng hnem a, player an la thar nasa hle. EPL squad nei tha leh nei chhah tak mai an ni a, an champion nawn leh a ni pawhin a mak hauh lo ang.
CIES in an chhut danin Scottish Premiership-ah Celtic an tha fal nalh a, Celtics in champion theihna chance an neih hi 63.3% ngawt niin an chhut a. Celtic hnaih bertu Rangers in champion theihna hun tha an neih chu 28.9% chauh a ni thung. Rangers hian kum 1983 hnu lama League-ah bul an tan chhiat ber tum an tawng mek a. Heti chung hian champion tura rinkai pahnihna an ni phak tho thung.
Celics an dah sang fal ang thoin CIES hian La Liga champion turin Real Madrid an ring fal hle bawk. Real Madrid in champion theihna chance an neih hi 40.6% zet niin an chhut a. Champion lai Barcelona in champion theihna hun tha an neih chu 29.6% chauh niin an dah ve thung. Bundesliga champion turin Bayern Munich in rin an kai fal viau a, champion theihna chance an neih hi 61.4% laiin niin chhut a ni a. Bayern Munich hnuai chiaha awm Borussia Dortmund in champion theihna chance an neih chu 8.8% chauh a ni ve thung.
CIES chhut danin Italian Serie A club lian pathum Inter Milan, Juventus leh Napoli te an inel tawk dawn viau niin a lang. Inter Milan in champion theihna chance 25.6% neiin an dinhmun a tha ber a, an hnuai chiahah 18.2% hmuin Juventus an awm a. Champion lai Napoli chuan 17.4% hmuin pathumna an luah ve thung.
Italian Serie A lamah club lian pathumte an inel tawk dawn viau nia a lan laiin French Ligue 1 lamah chuan champion lai Paris St-Germain chu a zawna a vawi nga nan champion leh tura ngaih an ni a. PSG in champion theihna chance an neih hi 73.0% zet niin CIES hian a, Ligue 1-ah chuan an dah chungnung hle.