Champions Cup-a Miami chakpuitu Messi

Nilaini khan Children’s Mercy Park, Kansas City-a CONCACAF Champions Cup first round first leg match-ah Lionel Messi khelhna Inter Miami chuan sikhat faiin Sporting Kansas City an hneh.
Inter Miami chakna goal awmchhun hi an superstar forward Messi tihluh niin, second half tir lam minute 56-ah goal awmchhun a khung.
Kansas City zan khaw vawt vin tuk hnuaiah team pahnih tan inkhelh a harsa a, vurin a la hmeh khang avangin khelmual a chang rut a, ball a tleng purh purh duh a, Children’s Mercy Park-a mipui 15,178 pungkhamwte pawh an thaw khu luih luih a; an inkhelh hun laia Children’s Mercy Park chhung vawh zawng kha (temperature) kha 3 degrees Fahrenheit (minus 16 Celsius) niin, khawvawt tizual turin vur thli a thaw heuh heuh a, thli thawt nat zawng pawh darkar khata mel kuaa chak a ni.
Khati ang boruakah pawh Argentine chuan player fing bik a nihna lantirin chakna goal awmchhun a khung a; a team-mate ni rei tawh tak Sergio Busquets ball pek chu dawngin, amah hnaih bertu lehlam pawl defender a bum zauh a, Sporting KC goalkeeper John Pulskamp dan zawh loh goal a khung.
Team pahnih hian karleh Thawhlehni zanah second leg an khel leh dawn a, Miami khaw lamah a ni ve tawh thung ang.